सलमान सर्वाधिक कमाउने भारतीय सेलिब्रिटी, शीर्ष १० मा पनि परेनन् शाहरुख

आर्थिक अभियान

मङ्सिर १९, नयाँ दिल्ली (भारत) । बलिउड सुपरस्टार सलमान खान भारतकै सबैभन्दा धनी सेलिब्रिटी बनेका छन् । फोब्र्स इण्डियाले सार्वजनिक गरेको सय सेलिब्रिटीको सूचिले यस्तो देखाएको हो । सूचिअनुसार सन् २०१७ को अक्टोबर १ देखि सन् २०१८ को सेप्टेम्बर ३० को बीचमा सलमानले २ अर्ब ५३ करोड २५ लाख भारु कमाएका छन् । खानको मुख्य भूमिका रहेको टाइगर जिन्दा हे, रेस थ्री जस्ता फिल्मको व्यावसायिक सफलताका कारण पनि शीर्ष स्थानमा रहन फल भएका हुन् । कयौं उपभोग्य वस्तुको विज्ञापन, टिभी प्रोग्रामको होष्टिङले पनि उनको आम्दानी बढाएको हो । सूचिको दोस्रो स्थानमा भने भारतीय क्रिकेट टोलीका कप्तान विराट कोहली छन् । समिक्षा अवधिमा कोहलीले २ अर्ब २८ करोड ९ लाख भारु कमाएका छन् । उनको यो आम्दानी गत वर्षको तुलनामा १ सय १६ दशमलव ५३ प्रतिशत धेरै हो । १ अर्ब ८५ करोड भारु कमाइसहित अर्का बलिउड अभिनेता अक्षय कुमार सूचिको तेस्रो स्थानमा रहेका छन् । भर्खरै अभिनेता रणवीर सिंहसँग विवाह बन्धनमा बाँधिएकी अभिनेत्री दिपिका पादुकोण भने सूचिको चौथो स्थानमा छिन् । समिक्षा अवधिमा उनले १ अर्ब १२ करोड ८० लाख भारु कमाइ गरेकी छिन् । उनको शीर्ष भूमिका रहेको पद्मावत् फिल्मको उल्लेख्य सफलता र ब्राण्ड इन्डोर्समेण्टका कारण पनि उनी उक्त स्थानमा रहन सफल भएकी हुन् । शीर्ष १०मा रहन सफल पादुकोण एक मात्रै महिला सेलिब्रिटी पनि हुन् । क्रिकेट स्टार महेन्द्र सिंह धोनी भने १ अर्ब १ करोड ७७ लाख भारु सहित पाँचौं स्थानमा छन् । सूचिको छैठौ देखि १० औं स्थानमा क्रमशः अमिर खान, अभिताभ बच्चन, रणवीर सिंह, सचिन तेन्दुलकर र अजय देवगण छन् । बलिउडका बादशाह भनेर चिनिने अभिनेता शाहरुख खान भने यस वर्ष सूचिको शीर्ष १० मा पनि परेका छैनन् । गत वर्षको तुलनामा यस वर्ष कमाई ५३ प्रतिशतले घटेर ५६ करोड भारुमा आएसँगै शाहरुख खान १३ औं स्थानमा समेटिएका हुन् । यस पटकको सूचिमा दक्षिण भारतीय फिल्म जगतबाट पनि १७ जना सेलिब्रिटी परेका छन् । यद्यपि अभिनेत्री नयनतारा सूचिमा पर्न सफल एक मात्रै दक्षिण भारतीय महिला हुन् । एजेन्सी

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस