होमनाथ उपाध्याय

Krishna Giri

होमनाथ उपाध्याय
अध्यक्ष, छाला जुत्ता तथा वस्तु उत्पादक सङ्घ नेपाल

दशैंमा ४० प्रतिशत व्यापार बढ्छ

दशैंको अवसरमा व्यवसायीले ल्याउने उपहार योजनाले व्यवसायमा कस्तो प्रभाव पार्छ ?
दशैं–तिहार नेपालीको सबैभन्दा ठूला पर्व हुन् । यस्ता चाडपर्वमा मानिसले नयाँ सामान खरीद गर्ने भएकाले कम्पनीहरूले पनि विभिन्न योजना सार्वजनिक गर्ने गर्छन् । पछिल्ला केही वर्षदेखि चाडपर्वका बेला योजना सार्वजनिक गर्ने प्रचलन संस्कारकै रूपमा विकास भइसकेको छ । केही कम्पनीहरू पुराना स्टक विक्री गर्न यस्तै समयको खोजीमा हुन्छन् । अहिले योजनाका नाममा लखपति र करोडपति बन्ने योजनाले ग्राहकको भावनामाथि खेलवाड भइरहेको छ । यस्ता अफरले ग्राहकमा भ्रम उत्पन्न गरेको छ । त्यस्तै केहीले सामानको मूल्य बढाएर छूट दिने गरेको पनि हामीले सुनेका छौं । नेपालमा उत्पादित जुत्तालगायत वस्तु क्लियरेन्सका रूपमा सेलमा आउन सक्छन् । तर, अरूले जस्तो ७० प्रतिशतसम्म छूट दिन भने सकिँदैन । दशैं–तिहारमा धेरैजसो नयाँ सामग्री नै किन्ने चलन छ । अफर नै नल्याउँदा पनि व्यापार भइरहेकै छ । सामानमा अफर दिएर पर्वलाई उत्सवका रूपमा मनाउन उत्पादक, विक्रेताहरूले साथ दिएका हुन् । दशैंमा अफरकै कारण पनि ४० प्रतिशतसम्म विक्री बढ्ने अपेक्षा गरेका छौं । भदौमा नयाँ कपडा तथा जुत्ता खरीद गर्ने ग्राहक दशैं नै पर्खेर बसेका पनि हुन्छन् ।

दशैंमा जुत्ता उत्पादक कम्पनीहरूबीच प्रतिस्पर्धा कस्तो छ ?
उत्पादन तथा मूल्य उचित नभए कुनै पनि प्रकारको योजनाले ग्राहकलाई आकर्षण गर्न सक्दैन । उपभोक्ताले खरीद गर्ने निर्णय गरिसकेपछि मात्र योजनाका वस्तु उपहारस्वरूप दिने हो । योजनाकै कारण जुत्ता खरीद गर्ने भन्ने हुँदैन । सबै ब्राण्डका आफ्नै ग्राहक छन् । ग्राहक सचेत भइसकेकाले उनीहरूको रोजाइ गुणस्तर तथा मूल्यमा लक्षित रहन्छ । पछिल्लो समय बजारमा जुत्ता उत्पादक कम्पनीबीच केही अस्वस्थ प्रतिस्पर्धा बढेको छ ।

नेपालमा स्वदेशी ब्राण्डका जुत्ताको बजारहिस्सा कति छ ?
नेपालमा हरेक वर्ष स्वदेशी जुत्ताको बजार बढिरहेको छ । विक्रीपछिको सुविधाका कारण पनि स्वदेशी उत्पादनप्रति ग्राहक आकर्षित भएका हुन् । अहिले नेपालमा खपत हुनेमध्ये ५५ देखि ६० प्रतिशत बजार नेपाली उत्पादनको छ । नेपालमा सञ्चालन भएको कुनै पनि उद्योगले मागअनुसारको उत्पादन गर्न सकेका छैनन् । नेपाली जुत्ता गुणस्तरीय तथा सस्तो भएकाले बजार बढ्दै गएको हो ।

बीएफ डियर हिल शुजले दशैं–तिहारको उपलक्ष्यमा कस्तो अफर ल्याएको छ ?
बीएफ डियर हिल शुज नेपालमा स्थापित ब्राण्ड हो । हामीले उपभोक्तालाई कुनै किसिमको भेदभाव नगरी अफर दिएका छौं । हामीले छूट तथा स्क्र्याच अफर योजना ल्याएका छैनौं । साथै डाइस्टार ब्राण्डसँगको सहर्कायमा विभिन्न सामग्री पनि उपलब्ध गराउने योजना ल्याएका छौं । बीएफ डियर हिल शुजको मुख्य विशेषता यसको गुणस्तर नै हो । यो जुत्ता सुविधायुक्त छ । यसको डिजाइन पनि उत्कृष्ट छ । यो शतप्रतिशत छालाद्वारा निर्मित जुत्तामा हामीले ६ महीनासम्मको वारेण्टी दिएका छौं । हामीले दैनिक १ सय जोर जुत्ता उत्पादन गर्दै आएका छौं । तर, अझै पनि विविध कारणले क्षमताअनुसार उत्पादन गर्न सकेका छैनौं । सेमी–अटोमेटिक प्रविधिद्वारा जुत्ता उत्पादन गर्छौं । अन्तरराष्ट्रिय गुणस्तरको जुत्ता उत्पादन गरी स्वदेशी जुत्ताप्रति नेपालीको आकर्षण बढाउनु हाम्रो मुख्य उद्देश्य हो । हामीले उत्पादन गरेका जेण्ट्स शुज धेरैले मन पराएका छन् । यसबाहेक स्कूल र कलेजमा प्रयोग हुने जुत्ता भने केटाकेटी दुवैका लागि उपयुक्त छ । हामीले उत्पादन गरेका जुत्ता देशका मुख्य शहरमा उपलब्ध छन् ।

प्रतिक्रिया [0]