प्रभु बैंक लिमिटेड : कम्पनी विश्लेषण (मंगलवार, २४ पुस २०७५)

आर्थिक अभियान

गतवर्ष ४० प्रतिशत हकप्रद जारी गरी नेपाल राष्ट्र बैंकको निर्देशनमा तोकेबमोजिम रू. ८ अर्ब चुक्तापूँजी पुर्‍याएको बैंकले यस वर्ष राम्रो लाभांश दिनेमा लगानीकर्ताहरू आशावादी देखिएका थिए । आइतवार नेप्सेमार्फत बैंकले गतवर्षको मुनाफाबाट ५ प्रतिशत बोनस शेयर र कर प्रयोजनका लागि ५ दशमलव २६३ प्रतिशत नगद लाभांशको प्रस्ताव गरेको छ । उक्त प्रस्तावबाट असन्तुष्ट लगानीकर्ताले आफ्नो शेयर विक्री गरी अन्तै नाफा सुरक्षित गर्ने योजना रहेको देखिन्छ । आइतवार प्रस्ताव सार्वजनिक भएको दिन २ सय ८० पटकको व्यापारमा १ लाख ५ हजार ४ सय ४० कित्ता शेयर कारोबार भएको थियो । त्यस दिन शेयरमूल्य अघिल्लो कारोबार दिनको तुलनामा ८ रुपैयाँ घटेको थियो । बैंकको १ वर्षको कारोबार अवधिमा उच्च मूल्य रू. २ सय ५८ र न्यून मूल्य रू. १ सय ७६ छ । सोमवारको कारोबारमा अन्तिम मूल्य रू. २ सय ४५ कायम भएको छ । प्राविधिक विश्लेषण विक्री चाप : कम्पनीको सोमवार भएको कारोबारको अन्तिम समयसम्म ७ हजार १ सय २८ कित्ता शेयर विक्री गर्ने माग रहे पनि खरीदका लागि कुनै पनि माग थिएन । निष्कर्ष कम्पनीको ६० दिनको कारोबार अवधिको अन्तिम दिनमा इभिनिङ स्टार बियरिश आकृति भएको मैनबत्ती बनेको छ । यस्तो आकतिले बियरिश ट्रेन्डमा रिभर्सल हुने उच्च सम्भावनालाई औंल्याउँछ । सो अवधिको कारोबारमा बैंकको आरएसआई न्युट्रल जोन ३८ विन्दुमा छ । यसले शेयर खरीदविक्री सन्तुलनमा रहेको देखाउँछ । त्यस्तै, स्ट्यान्डर्ड डेभिएशन कम्पनीको ४ दशमलव ३० विन्दुमा छ । उतारचढाव न्यून छ । स्ट्यान्डर्ड डेभिएशनमा देखिएको न्यून उतारचढावले जोखिम पनि न्यून भएको र प्रतिफल पनि न्यून रहने अवस्थाको संकेत गर्छ । सोही अवधिको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकआपसमा नजिकिन खोजेका छन् । हालको मूल्यरेखा यी दुई रेखाभन्दा तल छ । पछिल्लो शेयरमूल्य रू. २ सय ३८ देखि बजारको अवस्था परिवर्तन भई मूल्य महँगिएमा रू. २ सय ४८ मा प्रतिरोध पाउने र सस्तिएमा रू. २ सय २७ मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस