अपि पावर : कम्पनी विश्लेषण (बिहीवार, २६ पुस २०७५)

आर्थिक अभियान

अपि पावर कम्पनीले पुस २४ गते वार्षिक साधारणसभाको आयोजना गरी गतवर्षको मुनाफाबाट लगानीकर्तालाई ५ प्रतिशत बोनस शेयर वितरण गर्ने प्रस्ताव पारित गरेको छ । साथै, कम्पनीले २ सय प्रतिशत हकप्रद जारी गर्ने तयारी गरेको छ । हाल कायम रू. १ अर्ब १३ करोड ४० लाख चुक्तापूँजीको आधारमा कम्पनीले उक्त बोनस वितरण गर्नेछ । दार्चुला जिल्लामा बग्ने नौगढ गाड खोलामा ८.५ मेगावाट क्षमताको जलविद्युत् आयोजनाबाट व्यावसायिक उत्पादन गरिरहेको कम्पनीले ८ मेगावाटको अपर नौगढ गाड जलविद्युत् आयोजना निर्माण गरिरहेको छ । साथै, ४० मेगावाट क्षमताको अपर चमेलिया जलविद्युत् आयोजनको विद्युत् खरीद सम्झौताको प्रक्रियामा छ । आगामी वर्षदेखि अपर चमेलियाको निर्माण कार्य शुरू गर्ने कम्पनीको लक्ष्य छ । यस आयोजनाबाट व्यापारिक उत्पादन गर्न थालेपछि कम्पनीले वार्षिक ३० प्रतिशत लाभांश दिन सक्ने क्षमता कायम हुने कम्पनीको विश्वास छ । बुधवारको रू. १ सय ५२ मा खुलेको कारोबार अधिकतम रू. १ सय ५७ र न्यूनतम रू. १ सय ५० सम्म कारोबार भई अन्तिम मूल्य रू. १ सय ५४ कायम भएको छ । अघिल्लो दिनको तुलनामा शेयरमूल्य २ अंक बढेको छ ।

प्राविधिक विश्लेषण खरीद चाप : कम्पनीको बुधवार भएको शेयर कारोबारमा अन्तिम समयसम्म विक्री चापको तुलनामा खरीद चाप बढी छ । सो अवधिसम्म १० हजार ३ सय ५० कित्ता शेयर खरीद ७ हजार १ सय ५१ कित्ता शेयर विक्री गर्ने माग थियो ।

निष्कर्ष कम्पनीको ६० दिनको कारोबार अवधिको अन्तिम दिनमा होमिङ पिजन बुलिश आकृति भएको मैनबत्ती बनेको छ । यस्तो आकृतिले कम्पनीको शेयर मूल्य आगामी दिनमा बढ्ने संकेत गर्छ । आरएसआई न्युट्रल जोन ४५ दशमलव ४७ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन २ दशमलव ३१ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग नजिकिन खोजेका छन् । हालको मूल्य १४ दिने औसत मूल्यरेखाभन्दा तल छ भने २६ दिने औसत मूल्यरेखासँग जोडिएको छ । पछिल्लो शेयरमूल्य रू. १ सय ५४ देखि बजारको अवस्था परिवर्तन भई मूल्य महँगिएमा रू. १ सय ५७ मा प्रतिरोध पाउने र मूल्य सस्तिएमा रू. १ सय ५२ मा टेवा पाउने देखिन्छ ।

प्रतिक्रिया [0]