एनएमबी माइक्रोफाइनान्स : कम्पनी विश्लेषण (सोमवार, ७ माघ २०७५)

आर्थिक अभियान

एनएमबी बैंकको सहायक कम्पनीको रूपमा रहेको एनएमबी माइक्रोफाइनान्स वित्तीय संस्थाले गत आव समेतको मुनाफाबाट १५ प्रतिशत बोनस शेयर र शून्य दशमलव ७९ प्रतिशत नगद लाभांशको प्रस्ताव पुस २९ गतेको साधारणसभाबाट पारित गरेको छ । गत वर्ष २५ प्रतिशत बोनस शेयर र १ दशमलव ३२ प्रतिशत नगद लाभांश दिएको यस कम्पनीले यस वर्ष भने लाभांश घटाएको छ । अघिल्लो आवमा रू. ४ करोड ५४ लाख २ हजार मुनाफा गरेको यस कम्पनीको गत आवमा भने रू. ३ करोड २७ लाख ६ हजार मात्र नाफा भएको छ । नाफामा कमी आएकाले यस वर्ष लाभांश घटेको देखिन्छ । यो कम्पनीले पूँजी वृद्धि गर्नुपर्ने अवस्थालाई ध्यानमा राखी १ सय २५ प्रतिशत हकप्रद जारी गर्ने प्रस्ताव पनि साधारणसभाबाट पारित गराएको छ । हाल रू. १६ करोड २० लाख ६ हजार चुक्तापूँजी रहेको यस कम्पनीको हकप्रदपछि रू. ३६ करोड ४५ लाख १३ हजार पुग्नेछ । यस कम्पनीले ५४ ओटा जिल्लामा १ सय शाखा तथा उपशाखा कार्यालय मार्फत ८७ हजार ५ सय ९५ विपन्न घरपरिवारमा लघुवित्त सेवा प्रदान गर्दै आएको छ ।

कम्पनीको चालू आवको दोस्रो त्रैमासिक वित्तीय विवरण अनुसार आर्थिक वर्ष २०७५/७६ र २०७४/७५ बीच तुलना गर्दा :

• कम्पनीले दोस्रो त्रैमासमा रू. १ करोड ३ लाख २३ हजार खुद नाफा गरेको वित्तीय विवरण सार्वजनिक गरेको छ । यो नाफा गत आवको भन्दा ४३ प्रतिशत कम हो । गत आवको दोस्रो त्रैमासमा कम्पनीले रू. १ करोड ८१ लाख ६९ हजार खुद नाफा गरेको थियो । यो त्रैमासमा सञ्चालन मुनाफामा करीब ४५ प्रतिशत कमी आएकाले पनि नाफा घटेको देखिन्छ ।
• चालू आर्थिक वर्षको दोस्रो त्रैमासमा गत आवको तुलनामा कम्पनीको जगेडा कोष रकममा करीब ३ प्रतिशत मात्र वृद्धि देखिएको छ । गत आवको दोस्रो त्रैमासमा रू. ९ करोड ४४ लाख रहेको जगेडा कोष रकम चालू आवको दोस्रो त्रैमासमा रू. ९ करोड ७० लाख १७ हजार पुगेको छ ।
• चालू आवको दोस्रो त्रैमासमा कम्पनीले गत आवको सोही अवधिको तुलनामा निक्षेप ६१ प्रतिशत र कर्जा प्रवाह साढे २१ प्रतिशत बढाएको छ । यस अवधिमा कम्पनीको निक्षेप रू. ८६ करोड ४४ लाख ५ हजार र कर्जा प्रवाह रू. २ अर्ब ४५ करोड ४९ लाख २२ हजार छ ।
• कम्पनीको कुल सम्पत्तिमा गत आवको भन्दा २४ प्रतिशत वृद्धि देखिएको छ । हाल उसको कुल सम्पत्ति रू. ३ अर्ब २ करोड ५३ लाख ३ हजार छ ।
• गत आवको भन्दा २१ प्रतिशत बढाएर रू. २१ करोड ६७ लाख ४४ हजार ब्याज आम्दानी गरेको कम्पनीले ब्याजमा ३१ प्रतिशत बढी रू. १२ करोड ७२ लाख २९ हजार खर्चिएको छ ।
• सम्भावित जोखिम शीर्षकमा गत आवको भन्दा ५२ प्रतिशत बढी रू. २ करोड २२ लाख ७५ हजार रकम छुट्याएको छ ।
• पूँजीकोष लागत १० दशमलव शून्य ८ प्रतिशत र पूँजीकोष पर्याप्तता १० दशमलव १२ प्रतिशत छ ।
• कम्पनीको प्रतिशेयर आम्दानी वार्षिक रू. १२ दशमलव ७४, मूल्य आम्दानी अनुपात वार्षिक रू. ९० दशमलव १६, प्रतिशेयर नेटवर्थ रू. १ सय ५९ दशमलव ८८, प्रतिशेयर कुल सम्पत्तिको मूल्य रू. १ हजार ८ सय ६७ दशमलव ४० र तरलता अनुपात १७ दशमलव ९६ प्रतिशत छ ।
• अर्निङ पावर रेशियो : ०.००३४ गुणा
• अर्निङ यिल्ड रेशियो : १.१४ प्रतिशत
• खरीद चाप : कम्पनीको बिहीवार भएको शेयर कारोबारको अन्तिम समय सम्ममा विक्री चापको तुलनामा खरीद चाप बढी छ । सो अवधिसम्म ८ सय २ कित्ता शेयर विक्री र ८ सय ७० कित्ता शेयर खरीद गर्ने माग छ ।

निष्कर्ष कम्पनीको ५७ दिनको कारोबार अवधिको अन्तिम दिन सामान्य डोजी आकृति भएको मैनबत्ती बनेको छ । यस्तो आकृतिले कम्पनीको शेयरमूल्य आगामी दिन कुन गतिमा अघि बढ्ने भन्ने अन्योल रहेको संकेत गर्छ । यस्तो अवस्थामा लगानीकर्तामा ‘पर्ख र हेर’को स्थिति सृजना भएको छ । आरएसआई न्युट्रल जोन ४६ दशमलव ९६ विन्दुमा छ । यसले शेयर खरीद विक्री चाप सन्तुलनामा रहेको देखाउँछ । कम्पनीको स्ट्यान्डर्ड डेभिएशन ८९ दशमलव शून्य ९ विन्दुमा छ । उतारचढाव सामान्य रहेको देखाउँछ । त्यस्तै कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग जोडिएका छन् । हालको मूल्य यी दुई रेखाभन्दा तल छ । पछिल्लो शेयरमूल्य रू. १ हजार १ सय २० देखि बजारको अवस्था परिवर्तन भई महँगिएमा रू. १ हजार २ सय १४ मा प्रतिरोध पाउने र सस्तिएमा रू. १ हजार १ सय १० मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस