तिनाउ विकास बैंक : कम्पनी विश्लेषण (सोमवार, २७ फागुन २०७५)

Mar 11, 2019

लगानी कम्पनी विश्लेषण

आर्थिक अभियान २०६३ कात्तिक १५ गतेदेखि करोबार शुरू गरेको तिनाउ विकास बैंकले चालू आव २०७५/७६ को दोस्रो त्रैमाससम्ममा रू. ४ करोड ७ लाख नाफा कमाएको छ । यो गत आवको सोही अवधिको तुलनामा ३० प्रतिशत बढी हो । गत आवको दोस्रो त्रैमासमा कम्पनीले रू. ३ करोड ९९ लाख नाफा कमाएको थियो । चालू आवको पुस मसान्तसम्ममा कम्पनीले रू. ८२ लाख २४ हजार खराब कर्जा उठाएकाले र खुद ब्याज आम्दानी बढेकाले नाफामा वृद्धि भएको हो । कम्पनीको चुक्तापूँजी रू. ५० करोड ६९ लाख छ । २०७४/७५ को मुनाफाबाट शेयरधनीलाई १२ प्रतिशत बोनस शेयर वितरण गरेको छ । १२ प्रतिशत प्रतिशत बोनस शेयर वितरण गरेपछि कम्पनीको चुक्तापूँजी रू. ५६ करोड ७७ लाख पुगेको कम्पनीले वार्षिक प्रतिवेदनमा देखाएको छ । पुस मसान्तमा पनि कम्पनीले रूपन्देहीको मंगलापुर र कान्छीबजारमा दुईओटा शाखा सञ्चालनमा ल्याएको प्रमुख कार्यकारी अधिकृत प्रदीपकुमार श्रेष्ठले बताए । उनका अनुसार आगामी दिनमा क्षेत्रीय स्तरको विकास बैंकसँगै राष्ट्रिय स्तरको विकास बैंक बनाउने योजना छ ।

कम्पनीको चालू आवको दोस्रो त्रैमासिक वित्तीय विवरणअनुसार आर्थिक वर्ष २०७५/७६ र २०७४/७५ बीच तुलना गर्दा :

पुस मसान्तसम्ममा कम्पनीले रू. ५ अर्ब १७ करोड निक्षेप संकलन गरेको छ भने रू. ४ अर्ब ४१ करोड कर्जा प्रवाह गरेको छ । गत आवको सोही अवधिको तुलनामा निक्षेप ६१ प्रतिशत र कर्जा प्रवाह २५ प्रतिशत बढी हो । कम्पनीको लगानी रू. १३ करोड ४३ लाख छ भने रिजर्भ कोषमा रू. १८ करोड ७६ लाख छुट्याएको छ ।
कम्पनीले रू. ९ करोड ६० लाख खुद ब्याज आम्दानी गरेको छ । कर्मचारी खर्च ४० प्रतिशत बढेर रू. १ करोड ९४ लाख पुगेको छ । अन्य सञ्चालन खर्च रू. १ करोड ९४ लाख छ ।
स्थिर सम्पत्ति ३० प्रतिशत बढेर रू. १९ करोड ९० लाख पुगेको छ भने अन्य सम्पत्ति १९ प्रतिशत बढेर रू. ९ करोड ३५ लाख पुगेको छ । कम्पनीले सम्भावित जोखिमबापतको व्यवस्थामा रू. १ करोड ६९ लाख छुट्याएको छ । पूँजीकोष लागत ९ दशमलव १३ प्रतिशत र पूँजीकोष पर्याप्तता १३ दशमलव ७६ प्रतिशत छ ।
दोस्रो त्रैमासिक वित्तीय विवरणअनुसार प्रतिशेयर आम्दानी वार्षिक रू. १६ दशमलव ०८, मूल्य आम्दानी अनुपात ९ दशमलव ५२ प्रतिशत, प्रतिशेयर कुल सम्पत्ति मूल्य रू. १ हजार १ सय ९२ दशमलव ६३, तरलता अनुपात २३ दलशमलव ३२ प्रतिशत र प्रतिशेयर नेटवर्थ रू. १ सय ३७ दशमलव ०२ छ । आइतवारको शेयरमूल्य रू. १ सय ५५ कायम भएको छ ।
अर्निङ पावर रेशियो : ०.००६ गुणा
अर्निङ यिल्ड रेशियो : .१०.३७ प्रतिशत
खरीद चाप : कम्पनीको आइतवार भएको १२ः४१ सम्मको शेयर कारोबारमा विक्री चापको तुलनामा खरीद चाप बढी छ । सो समयसम्म ३ हजार ९ सय ५१ कित्ता शेयर खरीद गर्ने र १ सय १५ कित्ता शेयर विक्री गर्ने माग थियो ।

निष्कर्ष कम्पनीको ४४ दिनको कारोबारलाई लिएर गरिएको मैनबत्ती विश्लेषणको अन्तिम दिनमा कालो मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा घट्ने संकेत देखाउँछ । आरएसआई न्युट्रल जोन ६० दशमलव ६० विन्दुमा छ । यसले शेयर खरीदविक्री चाप सन्तुलनमा छ । स्ट्यान्डर्ड डेभिएशन ३ दशमलव १६ विन्दुमा छ । उतारचढाव न्यून छ । यस्तो अवस्थामा जोखिम कम हुन्छ भने प्रतिफल पनि कम रहन्छ । कम्पनीकोे मुभिङ एभरेजलाई हेर्दा २६ दिने र १४ दिने औसत मूल्यरेखा एकअर्कासँग नजिकिएका छन् । हालको मूल्य यी दुवै औसत मूल्यभन्दा माथि छ । पछिल्लो शेयरमूल्य रू. १ सय ५५ देखि बजारको अवस्था परिवर्तन भई मूल्य महँगिएमा रू. १ सय ६४ मा प्रतिरोध पाउने र सस्तिएमा रू. १ सय ४८ मा टेवा पाउने देखिन्छ । बिहीवार शेयरमूल्य अघिल्लो दिनको तुलनामा ३ अंक बढेर रू. १ सय ८२ मा बन्द भएको छ ।