नबिल बैंक लिमिटेड : कम्पनी विश्लेषण (बिहीवार, ३० फागुन २०७५)

Mar 14, 2019

लगानी कम्पनी विश्लेषण

आर्थिक अभियान निजीक्षेत्रको पहिलो बैंकको रूपमा स्थापित नबिल बैंकले गतवर्षको वार्षिक साधारणसभा फागुन २७ गते सम्पन्न गरेको छ । गतवर्षको मुनाफाबाट शेयरधनी लगानीकर्ताका लागि १२ प्रतिशत बोनस र २२ प्रतिशत नगद गरी ३४ प्रतिशत लाभांश वितरण गर्ने प्रस्ताव पारित गरेको छ । पारित बोनस वितरणपछि बैंकको चुक्तापूँजी रू. ९ अर्ब ८४ लाख ८ हजार पुग्नेछ । चालू आर्थिक वर्षको दोस्रो त्रैमासको वित्तीय अवस्थालाई आधार मान्दा बैंकको वितरण योग्य नाफा रू. २ अर्ब ४ करोड ५० लाख ४८ हजार छ । हाल एक केन्द्रीय कार्यालयसहित ७४ ओटा शाखा कार्यालय र ११६ एटीएममार्फत बैंकिङ सेवा प्रदान गर्दै आएको छ । समीक्षा वर्षमा २२ ओटा नयाँ शाखा थप गरेको बैंकले यस मध्य १२ ओटा शाख गाउँपालिकामा अवस्थित रहेको जानकारी दिएको छ । समीक्षा वर्षमै काठमाडौं, ललितपुर र भुक्तपुरभित्रका विभिन्न पाँच स्थानमा नयाँ शाखा खोल्ने योजनासमेत बैंकको छ ।

कम्पनीको दोस्रो त्रैमासिक वित्तीय विवरण अनुसार आर्थिक वर्ष २०७५/७६ र २०७४/७५ बीच तुलना गर्दा :

बैंकले यस वर्षको दोस्रो त्रैमासमा रू. २ अर्ब १७ करोड ६८ लाख ६२ हजार खुद नाफा गरेको छ । यो नाफा गतवर्षभन्दा करीब ४२ प्रतिशत बढी हो । गतवर्षको यस अवधिमा रू. १ अर्ब ८३ करोड ७७ लाख ८४ हजार खुद नाफा गरेको थियो ।
बैंकको जगेडा कोष रकम गतवर्षको दोस्रो त्रैमासको तुलनामा यस वर्ष ८४ दशमलव ८९ प्रतिशत वृद्धि भएको छ । गतवर्षको दोस्रो त्रैमासमा रू. ७ अर्ब ८५ करोड ५३ लाख २८ हजार रहेको जगेडा कोष रकम यस वर्ष रू. १४ अर्ब ५२ करोड ३७ लाख ५३ हजार रहेको छ ।
गत वर्षभन्दा यस वर्ष २३ प्रतिशत बढी रू. १ खर्ब ४९ अर्ब ३८ करोड २० लाख ११ हजार निक्षेप संकलन गरेको बैंकले गत वर्षभन्दा करीब २७ प्रतिशत बढी रू. १ खर्ब ३० अर्ब ७१ करोड ६ लाख ७५ हजार कर्जा प्रवाह गरेको छ ।
बैंकको कुल सम्पत्तिमा पनि २२ दशमलव ६२ प्रतिशत वृद्धि भई रू. १ खर्ब ७७ अर्ब ६७ करोड १५ लाख ६३ हजार पुगेको छ ।
यस वर्ष गत वर्षभन्दा ४० प्रतिशत बढी रू. ७ अर्ब ३२ करोड ५० लाख ६५ हजार ब्याज आम्दानी गरेको बैंकले ६२ प्रतिशत बढी रू. ३ अर्ब ७१ करोड ३७ लाख १० हजार ब्याजमा खर्चिएको छ ।
कुल सञ्चालन नाफा गत वर्षभन्दा २८ प्रतिशत बढी रू. ४ अर्ब ६९ करोड ६६ लाख ८८ हजार गरेको छ । भने कर्मचारी खर्च शीर्षकमा गत वर्षभन्दा साढे २३ प्रतिशत बढी रू. ९४ करोड ६० लाख ९९ हजार खर्चिएको छ ।
निष्क्रिय कर्जा शून्य दशमलव ६२ प्रतिशत कायम गरेको बैंकको पूँजीकोष लागत ५ दशमलव ९२ प्रतिशत छ ।
बैंकको प्रतिशेयर आम्दानी रू. ५४ दशमलव २८, मूल्य आम्दानी अनुपात १५ दशमलव ४० गुणा, प्रतिशेयर नेटवर्थ रू. २ सय ८० दशमलव ५७ र तरलता अनुपात २३ दशमलव ३६ प्रतिशत छ ।
अर्निङ पावर रेशियो : ०.०१७ गुणा
अर्निङ यिल्ड रेशियो : ७.५९ प्रतिशत
खरीद चाप : कम्पनीकोे बुधबार भएको शेयर कारोबारको अन्तिम समयसम्ममा खरीद चापको तुलनामा विक्री चाप बढी रहेको छ । यस अवधिसम्म ३ हजार ४१७ कित्ता शेयर खरीद र १२६० कित्ता शेयर विक्री गर्ने माग थियो ।

निष्कर्ष कम्पनीको ६४ दिनको कारोबार अवधिमा अन्तिम दिन सुटिङ स्टार आकृति बनेको छ । यस्तो आकृतिले शेयरमूल्य बियरिस ट्रेन्डमा रिभर्सल हुने संकेत गर्दछ । आरएसआई न्यूट्रल जोन ३४ दशमलव ६५ विन्दुमा छ । यसले खरीदविक्री चाप सन्तुलनमा रहेको देखाउँछ । त्यस्तै स्ट्यान्डर्ड डेभिएसन १३ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्दछ । मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकआपसमा टाढिएका छन् । हालको मूल्य यी दुई रेखाभन्दा तल छ । पछिल्लो शेयरमूल्य रू. ७ सय १५ देखि बजारको अवस्था परिवर्तन भई महँगिएमा रू. ७ सय २० मा प्रतिरोध र ६ सय ८७ मा टेवा पाउने देखिन्छ ।