ग्रामीण विकास लघुवित्त : कम्पनी विश्लेषण (बिहीवार, ७ चैत २०७५)

आर्थिक अभियान

ग्रामीण विकास लघुवित्त वित्तीय संस्था कम्पनी ऐन २०६३ बमोजिम उद्योग मन्त्रालय अन्तर्गत कम्पनी रजिष्ट्रारको कार्यालयमा २०७१ साउन १४ गते दर्ता भएको हो । कम्पनीले ७७ ओटै जिल्लामा १ सय ८८ ओटा शाखा कार्यालयबाट लघुवित्त सेवा प्रदान गर्दै आएको छ । कम्पनीले पूँजीवृद्धिका लागि हकप्रद शेयर जारी गर्न नियामक नेपाल धितोपत्र बोर्ड (सेबान) बाट फागुन २९ गते स्वीकृति पाएको छ । कम्पनी १ः०.५ अनुपातमा ३२ लाख ७५ हजार कित्ता हकप्रद शेयर जारी गर्ने तयारीमा छ । विक्रीप्रबन्धकमा एनआईबीएल एस क्यापिटल लिमिटेड छ । हकप्रद शेयर निष्कासन तथा बाँडफाँट गरेपछि कम्पनीको चुक्तापूँजी रू. ९८ करोड २५ लाख पुग्नेछ । हाल कम्पनीको चुक्तापूँजी रू. ६५ करोड ५० लाख छ । चालू आवको दोस्रो त्रैमासमा कम्पनीले रू. ११ करोड ३४ लाख नाफा कमाएको छ । यो गत आवको सोही अवधिको तुलनामा १५ प्रतिशत बढी हो । कम्पनीको खुद ब्याज आम्दानी र सञ्चालन नाफामा वृद्धि भएकाले नाफा बढेको हो ।

कम्पनीको चालू आवको दोस्रो त्रैमासिक वित्तीय विवरणअनुसार आर्थिक वर्ष २०७५/७६ र २०७४/७५ बीच तुलना गर्दा :

• पुस मसान्तसम्ममा कम्पनीले रू. ४ अर्ब ७५ करोड निक्षेप संकलन गरेको छ भने रू. ९ अर्ब १७ करोड कर्जा प्रवाह गरेको छ । कर्जा प्रवाह गत आवको सोही अवधिको तुलनामा १२ दशमलव ८१ प्रतिशत बढी हो । लगानी रू. ६० लाख ७९ हजार छ ।
• कम्पनीले रू. ४४ करोड ५४ लाख खुद ब्याज आम्दानी गरेको छ भने सञ्चालन नाफा रू. १४ करोड २६ लाख छ । कर्मचारी खर्च ८ प्रतिशत बढेर रू. २९ करोड २२ लाख पुगेको छ । कम्पनीले सम्भावित जोखिम बापतको व्यवस्थामा रू. ५ करोड ५४ लाख छुट्याएको छ ।
• निष्क्रिय कर्जा ४ दशमलव ५० प्रतिशत, पूँजीकोष लागत ९ दशमलव २९ प्रतिशत र पूँजीकोष पर्याप्तता ७ दशमलव ५९ छ । ग्रामीण क्षेत्रमा रहेका विपन्न परिवारलाई कृषि, उद्योग र सेवा व्यवसाय सञ्चालनका लागि लघु कर्जा प्रवाह गर्ने कम्पनीको योजना छ ।
• दोस्रो त्रैमासिक वित्तीय विवरणअनुसार प्रतिशेयर आम्दानी (वार्षिक) रू. ३४ दशमलव ६४, मूल्य आम्दानी अनुपात १२ दशमलव २७, तरलता अनुपात ७ दशमलव ७१ प्रतिशत र प्रतिशेयर नेटवर्थ रू. १ सय ५८ दशमलव ६५ छ । मंगलवारको शेयरमूल्य रू. ४ सय ५७ कायम भएको छ ।
• अर्निङ पावर रेशियो : ०.०१ गुणा
• अर्निङ यिल्ड रेशियो : . ७.५७ ५
• खरीद चाप : कम्पनीको सोमवार भएको शेयर कारोबारमा अन्तिम समयसम्म विक्री चापको तुलनामा खरीद चाप बढी छ । सो अवधिसम्म ३ हजार ८ सय ४० कित्ता शेयर खरीद गर्ने र १ हजार ५ सय ८४ कित्ता शेयर विक्री गर्ने माग थियो ।

निष्कर्ष कम्पनीको ६३ दिनको शेयर कारोबारलाई लिएर गरिएको मैनबत्ती विश्लेषणको अन्तिम दिनमा लङलेग्ड डोजी आकृति बनेको छ । यस्तो आकृतिले घट्ने बढ्ने कुनै पनि निश्चित संकेत देखाउँदैन । यस्तो अवस्थामा कम्पनीको आधारभूत पक्ष हेरेर लगानी गरेमा राम्रो प्रतिफल पाउन सकिन्छ । कम्पनीको आरएसआई न्युट्रल जोन ५७ दशमलव ८० विन्दुमा छ । यसले शेयर खरीदविक्री सन्तुलनमा रहेको देखाउँछ । त्यस्तै, कम्पनीको स्ट्यान्डर्ड डेभिएशन ५ दशमलव ८९ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । कम्पनीको सोही अवधिको मुभिङ एभरेजमा २६ दिने र १४ दिने औसत मूल्यरेखा एकअर्कासँग टाढिका छन् । हालको मूल्य यी दुई रेखाभन्दा माथि छ । मंगलवारको शेयरमूल्य रू. ४ सय ५७ देखि बजारको अवस्था परिवर्तन भई मूल्य महँगिएमा रू. ४ सय ६५ मा प्रतिरोध पाउने र मूल्य सस्तिएमा रू. ४ सय ४७ मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस