मेरो माइक्रोफाइनान्स वित्तीय संस्था : कम्पनी विश्लेषण (बिहीवार, ७ चैत २०७५)

Mar 21, 2019

लगानी कम्पनी विश्लेषण

आर्थिक अभियान नेपाल राष्ट्र बैंकबाट लघुवित्त कारोबार सञ्चालनका लागि २०७० असार ३० गते अनुमति प्राप्त गरेको मेरो माइक्रोफाइनान्स वित्तीय संस्था लिमिटेडले साउन ३ गतेदेखि औपचारिक रूपमा कारोबार शुरू गरेको हो । नेपालका ८ वाणिज्य तथा २ विकास बैंकको संयुक्त प्रवद्र्धनमा स्थापित यस कम्पनीले नयाँ प्रविधिहरूको प्रयोगबाट छिटो, छरितो र विश्वसनीय सेवा प्रदान गर्दै कार्यक्रम विस्तार गरेको छ । हाल ८६ शाखा कार्यालयबाट ८७ हजार ७४ विपन्न परिवारको घरमा लघुवित्त सेवा प्रदान पुर्‍याएको यस कम्पनीले चालू आर्थिक वर्षमा वित्तीय पहुँच नपुगेका ग्रामीण क्षेत्रमा शाखा विस्तार गर्ने लक्ष्य लिएको छ । चालू आवको दोस्रो त्रैमासमा कम्पनीले रू. ६ करोड १८ लाख नाफा कमाएको छ । यो गत आवको सोही अवधिको तुलनामा ७९ प्रतिशत बढी हो । खुद ब्याज आम्दानी र सञ्चालन नाफा बढेकाले नाफामा वृद्धि भएको हो । कम्पनीको चुक्तापूँजी रू. ३२ करोड ८९ लाख छ । कम्पनीले २०७४/७५ को मुनाफाबाट शेयरधनीलाई १५ प्रतिशत बोनस शेयर र ११ दशमलव ३२ प्रतिशत नगद लाभांश वितरण गरेको छ । बोनस शेयर शेयरधनीको डिम्याट खातामा र नगद लाभांश बैंक खातामा पठाइसकेको छ ।

कम्पनीको चालू आवको दोस्रो त्रैमासिक वित्तीय विवरणअनुसार आर्थिक वर्ष २०७५/७६ र २०७४/७५ बीच तुलना गर्दा :

पुस मसान्तसम्ममा कम्पनीले रू. ९६ करोड निक्षेप संकलन गरेको छ भने रू. ३ अर्ब ९९ करोड कर्जा प्रवाह गरेको छ । गत आवको सोही अवधिको तुलनामा निक्षेप ५४ प्रतिशत र कर्जा प्रवाह ४९ प्रतिशत बढी हो । रिजर्भ कोषमा कम्पनीले रू. १३ करोड ८६ लाख छुट्याएको छ ।
कम्पनीले रू. १५ करोड ७ लाख खुद ब्याज आम्दानी गरेको छ भने सञ्चालन नाफा रू. ९ करोड ७२ लाख पुगेको छ । कर्मचारी खर्च २४ दशमलव ५५ प्रतिशत बढेर रू. ८ करोड ३० लाख पुगेको छ । सम्भावित जोखिम बापतको व्यवस्थामा कम्पनीले रू. ८९ लाख ७७ हजार छुट्याएको छ ।
पूँजीकोष पर्याप्तता १६ दशमलव ६९ प्रतिशत र पूँजीकोष लागत ९ दशमलव ८६ प्रतिशत छ । आगामी दिनमा वित्तीय पहुँच नपुगेका ग्रामीण क्षेत्रमा शाखा विस्तार गरी अझ प्रभावकारी रूपमा सेवा तथा सुविधाको विस्तार गर्ने कम्पनीको योजना छ ।
दोस्रो त्रैमासिक वित्तीय विवरणअनुसार प्रतिशेयर आम्दानी रू. ३७ दशमलव ६२, मूल्य आम्दानी अनुपात २८ दशमलव ४७, तरलता अनुपात ३९ दशमलव ४६ प्रतिशत र प्रतिशेयर नेटवर्थ रू. १ सय ४२ दशमलव १५ छ । मंगलवारको शेयरमूल्य रू. ५ सय ८७ कायम भएको छ ।
अर्निङ पावर रेशियो : ०.०१ गुणा
अर्निङ यिल्ड रेशियो : . ६.४० ५
विक्री चाप : कम्पनीको मंगलवार भएको शेयर कारोबारमा अन्तिम समयसम्म खरीद चापको तुलनामा विक्री चाप बढी छ । सो अवधिसम्म ४ सय ६५ कित्ता शेयर विक्री गर्ने र ४ सय ४१ कित्ता शेयर खरीद गर्ने माग थियो ।

निष्कर्ष कम्पनीको ६४ दिनको शेयर कारोबालाई लिएर गरिएको मैनबत्ती विश्लेषणको अन्तिम दिनमा सामान्य डोजी आकृति बनेको छ । यस्तो आकृतिले कम्पनीको शेयरमूल्य घट्ने अथवा बढ्ने कुनै पनि निश्चित संकेत देखाउँदैन । कम्पनीको आरएसआई ओभरसोल्ड जोन २४ दशमलव ६७ विन्दुमा छ । यसले विक्री चाप बढी रहेको देखाउँछ । त्यस्तै, कम्पनीको स्ट्यान्डर्ड डेभिएशन ३ दशमलव ०७ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । कम्पनीको सोही अवधिको मुभिङ एभरेजमा २६ दिने र १४ दिने औसत मूल्यरेखा एकअर्कासँग नजिकिएका छन् । हालको मूल्य यी दुई रेखाभन्दा तल छ । मंगलवारको शेयरमूल्य रू. ५ सय ८७ देखि बजारको अवस्था परिवर्तन भई मूल्य महँगिएमा रू. ६ सय ५ मा प्रतिरोध पाउने र मूल्य सस्तिएमा रू. ५ सय ८० मा टेवा पाउने देखिन्छ ।