देवः विकास बैंक : कम्पनी विश्लेषण (शुक्रवार, २२ चैत २०७५)

Apr 5, 2019

लगानी कम्पनी विश्लेषण

आर्थिक अभियान देवः विकास बैंकले सहारा विकास बैंकलाई गाभ्ने तयारी गरेको थियो । सहारा विकास बैंकले आफै पूँजी पुर्‍याउने निर्णय गरेसँगै दुई बैंक मर्जरमा नजाने भएका छन् । सहारा विकास बैंकसँग मर्जर प्रक्रिया रोकिएसँगै देवः विकास बैंक वेष्टर्न डेभलपमेन्ट बैंकलाई एक्विजिशन गर्ने प्रक्रियामा छ । चालू आर्थिक वर्षभित्रै सातै प्रदेशमा आफ्नो शाखा विस्तार गर्ने योजना देवःको छ । बैंकले चालू आवको साधारणसभा गरेको छैन । बैंकको चुक्तापूँजी रू. २ अर्ब ५३ करोड छ भने वेष्टर्न डेभलपमेन्ट बैंकको चुक्तापूँजी रू. ५० करोड ४० लाख छ । ६२ दिनको कारोबार अवधिमा देवःको शेयरमूल्य अधिकतम रू. १ सय २९ र न्यूनतम रू. १ सय २० पुगेको छ । प्राविधिक विश्लेषण खरीद चाप : कम्पनीको बिहीवार भएको शेयर कारोबारमा अन्तिम समयसम्म विक्री चापको तुलनामा खरीद चाप बढी छ । सो अवधिसम्म १९ हजार ६ सय ७९ कित्ता शेयर खरीद गर्ने र ६ हजार १ हजार ८० कित्ता शेयर विक्री गर्ने माग थियो । निष्कर्ष कम्पनीको ६४ दिनको कारोबार अवधिलाई लिएर गरिएको मैनबत्ती विश्लेषणमा अन्तिम दिनमा लङलेग्ड डोजी आकृति बनेको छ । यस्तो आकृतिले कम्पनीको शेयरमूल्य आगामी दिनमा घट्ने अथवा बढ्ने कुनै पनि निश्चित संकेत देखाउँदैन । आरएसआई न्युट्रल जोन ५१ दशमलव ६८ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन शून्य दशमलव ४० विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य यी दुई रेखाको बीचमा छ । पछिल्लो शेयरमूल्य रू. १ सय २६ देखि बजारको अवस्था परिवर्तन भई मूल्य महँगिएमा रू. १ सय २७ मा प्रतिरोध पाउने र मूल्य सस्तिएमा रू. १ सय २५ मा टेवा पाउने देखिन्छ ।