हरेक वर्ष मेला आयोजना गर्ने

आर्थिक अभियान

ललितपुर उद्योग वाणिज्य संघले स्थापना कालदेखि जिल्लाका उद्यमी व्यवसायीहरूको हकहितका लागि कार्य गर्दै आएको छ । व्यवसायीको उद्यमशीलता विकास, व्यवसाय गर्ने क्रममा भोग्नुपरेका अवरोध र नीतिगत समस्यामा पैरवी गर्ने कार्य संघले निरन्तर गरिरहेको छ । यसैगरी, ललितपुरमा उत्पादित सामग्रीको राष्ट्रिय र अन्तरराष्ट्रिय क्षेत्रमा बजार विस्तार तथा व्यवसायीहरूको ‘एक्सपोजर’ क्षमता बढाउन संघ स्थापना कालदेखि जुटेको छ । संघले स्वदेश तथा विदेशमा हुने मेला र महोत्सवमा उद्यमी व्यवसायीलाई सहभागी गराउने कार्यलाई पनि निरन्तरता दिएको छ । त्यस्तै, ललितपुर उद्योग वाणिज्य स्वयंले विभिन्न मेला तथा महोत्सवको पनि आयोजनामा पनि जोड दिएको छ । २०२३ सालमा स्थापना भएको ललितपुर उद्योग वाणिज्य संघ ५२औं वर्षमा प्रवेश गरेको छ । नेपाल उद्योग वाणिज्य महासंघसँगै स्थापना भएको यो संघले नेपालको चेम्बर अभियानमा स्थापनाकालदेखि नै सशक्त भूमिका निर्वाह गरेको छ । संघले स्वर्ण जयन्ती समापन समारोहमा पहिलो ललित अन्तरराष्ट्रिय व्यापार मेलाको आयोजना गरेसँगै हरेक वर्ष मेला आयोजना गर्ने नीति सार्वजनिक गरेको थियो । हरेक वर्ष मेला आयोजना गर्ने नीतिकै निरन्तरताको रूपमा यही बुधवारदेखि वैशाख १ गते आइतवारसम्म ललित अन्तरराष्ट्रिय व्यापार मेला हुँदै छ । चैत्र २७ गते बिहान १० बजे पुलचोकबाट करीब सय मिटर तल नटोलस्थित मदनस्मारक माध्यमिक विद्यालयको खुला प्रांगणमा एक समारोहबीच उपराष्ट्रपति नन्दबहादुर पुनले मेलाको उद्घाटन गर्ने कार्यक्रम रहेको छ । ललितपुरमा उत्पादित सामग्रीको अन्तरराष्ट्रिय स्तरमा बजार विस्तार गर्न र विभिन्न देशमा उत्पादित सामग्रीको बजारको रूपमा ललितपुरलाई विकसित गर्न मेलाको आयोजना गरिएको हो । ललितपुरमा लगानी भिœयाउने र लगानीका सम्भावना पहिल्याउने दिशामा ‘लगानी मिट’ गर्ने लक्ष्य संघले लिएको छ । मेलामा करीब सयओटा स्टल रहनेछन् । त्यसमध्ये भारत, पाकिस्तान, बंगलादेश, चीनलगायत विभिन्न देशका ३० ओटा स्टल रहनेछन् । नेपालमा उत्पादन भएका हस्तकलाका विविध सामग्रीको स्टल रहने आयोजकको भनाइ छ । विभिन्न सांस्कृतिक झाँक्रीसहित संस्कृतिको आनन्द र मनोरम वातावरणमा क्रेता तथा विक्रेताबीच प्रत्यक्ष भेटघाट हुने संघले बताएको छ । मेलामा दर्शकहरूले अत्यधिक रुचाएका नेपाल आइडियल बुकिबुकीको विशेष प्रस्तुति रहनेछ । मेलाबाट स्वदेशी व्यवसायी, विक्रेताहरूलाई आफ्नो उत्पादन अन्तरराष्ट्रिय रूपमा विकास गर्ने अवसर पाउनेछन् । व्यवसायीहरूबीच आपसी अध्ययन तथा ज्ञान, शीप आदानप्रदान, पर्यटन र व्यावसायिक विकासमा पनि मेलाले टेवा पु¥याउने संघले बताएको छ । मेला अवधिभर ललितपुरको कला, संस्कृति, गीतसंगीतको मज्जा लिँदै नेवारी खाजासँगै अन्य खाजाको स्वाद लिन सकिनेछ । मेलामा करीब ५ करोड रुपैयाँको कारोबार हुने र ५ लाखले मेलाको अवलोकन गर्ने अनुमान छ । आर्थिक विकाससँगै ललितपुरको विशिष्ट सामाजिक, सांस्कृतिक, धार्मिक तथा भौगोलिक वातावरण भएको जिल्लामा संघलाई सामाजिक, सांस्कृतिक विकासमा चासो राख्ने एक महत्त्वपूर्ण सरोकारवाला संस्थाको रूपमा लिइँदै आएको छ । यसैलाई दृष्टिगत गरी संघले विभिन्न जात्रा, पर्व सञ्चालनका लागि आर्थिक सहयोग गर्दै आएको छ । संघले विश्व सम्पदामा सूचीकृत पाटन दरबार क्षेत्रस्थित ऐतिहासिक भीमसेन मन्दिरको पुनर्निर्माण गर्दै छ । वैशाख १२ गतेको विनाशकारी भूकम्पले क्षतिग्रस्त भीमसेन मन्दिरको करीब ३ वर्षसम्म पनि पुनर्र्निर्माण हुन सकेको थिएन । सो मन्दिरको पुनर्निर्माण ललितपुर उद्योग वाणिज्य संघको अगुवाइमा भइरहेको छ । ललितपुरका व्यापारीहरू इष्ट देवताकोे रूपमा भीमसेन मन्दिरलाई पुज्दछन् । भीमसेन मन्दिरप्रति व्यापारीहरूको श्रद्धा र विश्वासको प्रतीकको रूपमा रहेको यस मन्दिरको पुनर्निर्माणको अगुवाइ संघले गर्नुपर्ने मागलाई सुनवाइ गर्दै पुनर्निर्माण प्राधिकरणले पुरातŒव विभाग, ललितपुर महानगरपालिका हुँदै संघलाई मन्दिर पुनर्निर्माण गर्न स्वीकृति दिएको थियो । यस जिम्मेवारीलाई अवसरको रूपमा लिँदै पुनर्निर्माणका लागि कटिबद्ध रहेको संघको भनाइ छ । मन्दिर पुनर्निर्माण गर्न करीब ४ करोड रुपैयाँ लाग्ने प्रारम्भिक अनुमान छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस