नाडा अटो शो २०२३ विशेष: अटो शोले अर्थतन्त्र चलायमान बनाउन मद्दत गर्छ

अभियान संवाददाता

काठमाडौंको भृकुटीमण्डपमा सवारीसाधनको कुम्भ मेला ‘नाडा अटो शो २०२३’ शुरू भएको छ । यसले सुस्ताएको अटो व्यवसायलाई गति दिन र अर्थतन्त्रमा सकारात्मक सन्देश प्रवाह गर्न सकारात्मक योगदान गर्ने अपेक्षा गरिएको छ । यसै सन्दर्भमा आर्थिक अभियानले अटो सोका बारेमा अर्थमन्त्रीलगायत विभिन्न व्यवसायीको विचार संकलन गरेको छ ।

डा. प्रकाशशरण महत 

अर्थमन्त्री

नेपाल सरकार निजीक्षेत्र आर्थिक रूपान्तरणको वाहक हो भन्ने कुरामा विश्वास राख्दछ । हरेक नागरिकको क्षमता, सृजना, सम्भावना र उद्यमशीलताको पूर्ण उपयोगबाट मात्रै आर्थिक समृद्धि सम्भव छ । अर्थतन्त्रमा भएको समस्या अहिले कम हुँदै गएको छ । त्यसैले अब आर्थिक गतिविधि विस्तारै अघि बढ्छ । विदेशी मुद्रा सञ्चिति यथेष्ट छ, पर्यटन क्षेत्र पनि अघि बढेको छ, घरजग्गा कारोबार बढेका कारण आर्थिक गतिविधि पनि बढ्ने देखिन्छ । त्यसैले अटोमोबाइल्स क्षेत्रमा पनि सुधार आउने देखिन्छ । अटोमोबाइल्स क्षेत्र हाम्रोमा राजस्व संकलनको मुख्य स्रोत बन्न पुगेको छ । अहिले ग्रीन इकोनमीतर्फ जाँदै गर्दा विद्युतीय सवारीसाधनतर्फ जान आवश्यक छ । पेट्रोलियम पदार्थको आयात घटाउनका साथै देशमै उत्पादन भएको विद्युत् खपत गरी आत्मनिर्भरताका लागि पनि विद्युतीय सवारीसाधनको प्रयोग बढाउन आवश्यक छ । विद्युतीय सवारीसाधनको प्रयोग बढाउन अहिले सरकारले चार्जिङ स्टेशन बनाउनुका साथै करमा पनि छूट दिँदै आएको छ । नाडा अब डिलरको संघभन्दा पनि उत्पादकको संघ बन्नुपर्छ । एसेम्बलिङ शुरू गर्नेलाई सरकारले सहुलियत दिन्छ । अब कम्पनीहरूले नेपालमा मोटरसाइकलको एसेम्बलिङ शुरू भइसकेकाले गाडीको पनि एसेम्बलिङ शुरू गर्नुपर्छ ।

चन्द्रप्रसाद ढकाल

अध्यक्ष, नेपाल उद्योग वाणिज्य महासंघ

नेपालमा सबैभन्दा धेरै राजस्व अटोमोबाइल्स क्षेत्रबाटै संकलन हुने गरेको छ । अहिले यो क्षेत्रको व्यवसाय खुम्चिँदा करीब ५० प्रतिशत राजस्व घटेको देखिन्छ । सरकारी निकाय वा नियामक निकायहरूले निजीक्षेत्रले दिने सुझाव उसका लागि मात्र नभएर समग्र मुलुकको लागि हुन्छ भनेर बुझ्न आवश्यक छ । अहिले नेपाल सरकार अन्तर्गतका मन्त्रालय र नियमनकारी निकायबीच समन्वयन भएको देखिन्छ । उनीहरूले आफूले नियमन गर्ने संस्थाको लागि मात्र काम गरेको सर्वासाधारणले पनि अनुभूत गरेका छन् । चालूपूँजी कर्जा मार्गदर्शन, श्रीलंकाको त्रास देखाएर आएका नीतिहरूदेखि आयात प्रतिबन्धको नीति बनाउँदासम्म निजीक्षेत्रका सुझावलाई बेवास्ता गरियो । निजीक्षेत्रले माग्ने काम मात्र गर्छ भन्ने भान भएको पाइन्छ । आयात प्रतिबन्ध, जोखिम भारलगायतका नीतिले अहिले मुलुक मन्दीमा पुगेको अवस्था छ । त्यसको असर सीमित व्यवसायलाई मात्र नभएर समग्र अर्थतन्त्रमा परेको छ । त्यसैले निजीक्षेत्रले दिने सुझाव व्यापारीको लागि मात्र नभएर आम सर्वसाधारण र समग्र मुलुकको लागि हुन्छ भन्ने कुरा बुझ्न आवश्यक छ । निजीक्षेत्रले दिएको सुझावका सन्दर्भमा व्यवसायीले आफ्नो मात्र कुरा गर्छन्, मागमात्र राख्छन् भन्ने नियामकीय निकायहरूको सोचले गर्दा अहिलेको अवस्था सृजना भएको हो । 

राजेन्द्र मल्ल

अध्यक्ष, नेपाल चेम्बर अफ कमर्स

नाडा अटो शो २०२३ ले खस्किएको अर्थतन्त्रमा पनि गति सृजना गर्ने अपेक्षा रहेको छ । शोले गर्दा तिज, दशैं, तिहारलगायत चाडपर्वमा उद्योग, व्यवसायलाई केही सहज हुने र मुलुकको आर्थिक वृद्धि पनि हुने अपेक्षा छ । अहिले बजारमा नकारात्मक कुराहरू बढी आइरहेको पाइन्छ । तर, अहिले उद्योग व्यवसायका साथै पर्यटन क्षेत्रमा पनि सुधार आएको देखिन्छ । यस्तै आईटी क्षेत्रमा पनि निर्यात बढेसँगै केही सुधार भएको देखिन्छ । यसले गर्दा अर्थतन्त्र चलायमान हुने परिस्थिति छ । तर, हाम्रोमा नियामकले पटकपटक निर्देशिका ल्याएर उद्योग व्यवसाय खल्बल्याउने काम गरिरहेको पाइन्छ । त्यसैले सरकारले यसलाई सही ट्र्याकमा ल्याउन पहल गर्नुपर्छ ।

राजेशकुमार अग्रवाल

अध्यक्ष, नेपाल उद्योग परिसंघ

अटोमोबाइल्स क्षेत्रले राजस्वमा ठूलो योगदान गर्दै आएको छ । त्यसैले यो क्षेत्र चलायमान भएमा अर्थतन्त्र नै चलायमान हुने देखिन्छ । अर्थतन्त्रलाई चलायमान बनाउन नाडा अटो शोले बल पुर्‍याउने विश्वास लिएको छु । उच्च ब्याजदर, नगद प्रवाहमा समस्या, उत्पादनमा कमी, समग्र मागमा आएको कमीलगायत कारण निजीक्षेत्रको मनोबल घट्नुका साथै अर्थतन्त्र पनि मन्दीमा छ । त्यसैले अर्थतन्त्रको प्रमुख चुनौतीको सामना गर्दै मन्दीमा रहेको अर्थतन्त्र उकास्न आवश्यक छ । त्यसका लागि निजीक्षेत्रको घटेको मनोबल बढाउन आवश्यक छ । निजीक्षेत्रको मनोबल बढाउन समग्र मागमा वृद्धि ल्याउन आवश्यक छ ।

अनुप बराल 

सभापति, नाडा अटो शो २०२३

नेपालमा अहिले अटो व्यवसाय धराशयी बनेको छ । हामीले चार वर्षपछि अटो शो गर्ने प्रयास गरेका हौं । यो चार वर्षको समयमा अटो व्यवसायी हँसिलो अनुहार लिएर हिँड्न पाएका छैनन् । समग्र अटो क्षेत्र समस्यामा परेपछि हामीले अटो शो आयोजना गरेका छौं । यति गर्न हामीले निकै मेहनत गर्नु परेको छ । हामीकहाँ शो गर्नको लागि हामीलाई राम्रो प्रदर्शनी हलको पनि समस्या छ । त्यसैले काठमाडौंमा एउटा राम्रो प्रदर्शनी हलको पनि आवश्यकता देखिन्छ । हामीले प्रदर्शनीमा अन्तरराष्ट्रिय ब्रान्डका सवारीसाधन, लुब्रिकेन्ट, टायर, पार्टपुर्जाका साथै राष्ट्रिय ब्रान्डका अटो सामग्री पनि राखेका छौं । नाडा अटो शोले अहिलेको मन्दीमा अर्थतन्त्रलाई केही चलायमान बनाउन अवश्य नै मद्दत गर्छ भन्ने विश्वास लिएको छु ।

प्रतिक्रिया [0]