लक्ष्मी लघुवित्त वित्तीय संस्था : कम्पनी विश्लेषण (मंगलवार, १० वैशाख २०७६)

आर्थिक अभियान

लक्ष्मी लघुवित्त कम्पनी लक्ष्मी बैंकको सहायक कम्पनीले हो । यस कम्पनीमा ७० प्रतिशत लक्ष्मी बैंकको शेयर स्वामित्व छ भने सर्वसाधारणतर्फ ३० प्रतिशत छ । चालू आवको चैत मसान्तसम्ममा कम्पनीले रू. ७ करोड ९१ लाख नाफा कमाएको छ । यो नाफा गत आवको सोही अवधिको तुलनामा १८ प्रतिशत बढी हो । सो अवधिमा कम्पनीले रू. ६ करोड ६६ लाख नाफा कमाएको थियो । चालू आवको चैत मसान्तसम्ममा कम्पनीको खुद ब्याज आम्दानी र सञ्चालन नाफामा वृद्धि भएकाले नाफा बढेको हो । कम्पनीको चुक्तापूँजी रू. २४ करोड २० लाख छ । कम्पनीले शेयरधनीलाई २०७४/७५ को मुनाफाबाट २६ दशमलव ३२ प्रतिशत नगद लाभांश बैंक खातामा जम्मा गरिदिएको छ । कम्पनीको सोमवार भएको शेयर कारोबारमा अन्तिम समयसम्म खरीद चापको तुलनामा विक्री चाप बढी छ । सो अवधिसम्म १ हजार २ सय ५३ कित्ता शेयर विक्री गर्ने र ४ सय ४५ कित्ता शेयर खरीद गर्ने माग थियो ।

कम्पनीको ६० दिनको कारोबार अवधिको अन्तिम दिनमा कालो मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा घट्ने संकेत गर्छ । आरएसआई न्युट्रल जोन ५५ दशमलव ४८ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन १२ दशमलव ७८ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य यी दुई रेखाभन्दा माथि छ । सोमवारको शेयरमूल्य रू. ८ सय ५ देखि बजारको अवस्था परिवर्तन भई मूल्य महँगिएमा रू. ८ सय ३५ मा प्रतिरोध पाउने र मूल्य सस्तिएमा रू. ७ सय ७० मा टेवा पाउने देखिन्छ । सोही अवधिमा कम्पनीको शेयरमूल्य अघिल्लो दिनको तुलनामा ६ अंक बढेर रू. ८ सय ३५ पुगेको छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस