छिमेक लघुवित्त वित्तीय संस्था : कम्पनी विश्लेषण (बिहीवार, १९ वैशाख २०७६)

May 2, 2019

लगानी कम्पनी विश्लेषण

आर्थिक अभियान छिमेक लघुवित्त वित्तीय संस्था लिमिटेडले वैशाख ३० गते १७औं वार्षिक साधारणसभाको आयोजना गर्ने भएको छ । कम्पनीले गतवर्षको सञ्चित मुनाफाबाट १८ प्रतिशत बोनस शेयर र २२ प्रतिशत नगद लाभांश वितरण गर्ने प्रस्ताव सभामा लैजाँदै छ । सभा र लाभांश प्रयोजनका लागि सोमवार कम्पनीले बुक क्लोज गरेको थियो । नेप्सेले १८ प्रतिशत बोनस शेयरको समायोजनपछि कम्पनीको शेयरमूल्य प्रतिकित्ता रू. ९ सय ४८ दशमलव ३१ तोेकेको थियो । नेप्सेले कम्पनीको आधार मूल्य रू. १ हजार ९० दशमलव १५ लिएको हो । मूल्य समायोजनपछि कम्पनीको शेयर कारोबार रू. ९ सय ९५ मा खुला भएर अन्तिम मूल्य रू. ९६८ कायम भएको छ । यस दिन कम्पनीको शेयरमूल्य अधिकतम रू. ९९० र न्यूनतम रू. ९५८ पुगेको थियो । कम्पनीले तेस्रो त्रैमासमा रू. ६४ करोड ३० लाख २३ हजार खुद नाफा कमाएको छ । हाल कम्पनीको चुक्तापूँजी रू. १ अर्ब छ ।

कम्पनीको ६४ दिनको कारोबार अवधिको अन्तिम दिनमा डोजी आकृति भएको मैनबत्ती बनेको छ । यस्तो आकृतिले कम्पनीको शेयरमूल्य घट्ने अथवा बढ्ने कुनै निश्चित संकेत गर्दैन । आरएसआई न्युट्रल जोन ४८ दशमलव ९४ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन ५३ सय ९२ विन्दुमा छ । उतारचढाव मध्यम छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य १४ दिने औसत मूल्यरेखाभन्दा तल र २६ दिनेभन्दा माथि छ । मंगलवारको शेयरमूल्य रू. ९ सय ६८ देखि बजारको अवस्था परिवर्तन भई मूल्य महँगिएमा रू. १ हजार १ सय १९ मा प्रतिरोध पाउने र मूल्य सस्तिएमा रू. ९ सय ५२ मा टेवा पाउने देखिन्छ ।