कुमारी बैंक: कम्पनी विश्लेषण ( आइतवार, बैशाख २२, २०७६)

May 5, 2019

लगानी कम्पनी विश्लेषण

आर्थिक अभियान बैंकले शेयरधनीलाई २१ दशमलव २५ प्रतिशत बोनस शेयर वितरण गर्ने प्रस्ताव गरेको छ । कम्पनीले प्रस्ताव पारित गर्न वैशाख २६ गते साधारणसभाको आयोजना गर्ने भएको छ । वैशाख ५ गतेसम्म शेयर किन्ने शेयरधनीले उक्त लाभांश पाउनेछन् । चालू आवको ९ महीनामा बैंकले रू. १ अर्बभन्दा बढी नाफा कमाएको छ । यो नाफा गत आवको सोही अवधिको तुलनामा ३६ प्रतिशत बढी हो । सो अवधिमा बैंकले रू. ७३ करोड ६३ लाख नाफा कमाएको थियो । हाल बैंकको चुक्तापूँजी रू. ७ अर्ब १६ करोड छ । २१ दशमलव २५ बोनस शेयर वितरण गरेपछि पूँजी रू. ८ अर्बभन्दा बढी पुग्नेछ । बैंकको वितरणयोग्य नाफा रू. ६१ करोड ६० लाख छ । बिहीवारको कारोबार अवधिमा विक्री चापको तुलनामा खरीद चाप बढी छ । सो अवधिमा ४७ हजार ९६ कित्ता शेयर खरीद र ८ हजार ८ सय ८८ कित्ता विक्री गर्ने माग थियो ।

कम्पनीको ६१ दिनको कारोबार अवधिको अन्तिम दिनमा कालो ओपनिङ मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा घट्ने संकेत गर्छ । आरएसआई न्युट्रल जोन ३८ दशमलव २५ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन ४ दशमलव ५७ विन्दुमा छ । उतारचढाव न्यून छ । यस्तो अवस्थामा जोखिम कम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य १४ दिने औसत मूल्यरेखा र २६ दिने औसत मूल्यरेखाभन्दा तल छ । बिहीवारको शेयरमूल्य रू. २ सय २४ देखि बजारको अवस्था परिवर्तन भई महँगिएमा रू. २ सय ३६ मा प्रतिरोध र सस्तिएमा रू. २ सय २० मा टेवा पाउने देखिन्छ ।