आरएसडीसी लघुवित्त वित्तीय संस्था : कम्पनी विश्लेषण ( आइतवार, बैशाख २२, २०७६)

May 5, 2019

लगानी कम्पनी विश्लेषण

आर्थिक अभियान कम्पनीले गत आवको नाफाबाट शेयरधनीलाई १० प्रतिशत बोनस शेयर वितरण गरेको छ । उक्त बोनस शेयर शेयरधनीको हितग्राही खातामा जम्मा भएको छ । कम्पनीले चालू आवको तेस्रो त्रैमासमा रू. ४ करोड २८ लाख नाफा कमाएको छ । यो नाफा गत आवको सोही अवधिको तुलनामा ८५ प्रतिशत बढी हो । सो अवधिमा कम्पनीले रू. २ करोड ३० लाख नाफा कमाएको थियो । कम्पनीको चुक्तापूँजी रू. ६३ करोड ३५ लाख छ । बिहीवार भएको शेयर कारोबारमा खरीद चापको तुलनामा विक्री चाप बढी छ । सो अवधिमा ३ हजार १ सय ११ कित्ता शेयर विक्री गर्ने र १ हजार ६ सय २३ कित्ता शेयर खरीद गर्ने माग थियो ।

कम्पनीको ६० दिनको कारोबार अवधिको अन्तिम दिनमा इन्भर्टेड ह्याम्मर आकृति बनेको छ । यस्तो आकृतिले कम्पनीको शेयरमूल्य बुलिशमा रिभर्स हुने संकेत गर्छ । विश्वसनीयता भने सामान्य छ । आरएसआई न्युट्रल जोन ६४ दशमलव ८६ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन ९ दशलमव ३० विन्दुमा छ । उतारचढाव न्यून छ । यस्तो अवस्थामा जोखिम कम हुन्छ भने प्रतिफल पनि कम हुन्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य १४ दिने औसत मूल्यरेखा र २६ दिने मूल्यरेखाभन्दा माथि छ । बिहीवारको शेयरमूल्य रू. ४ सय ८ देखि बजारको अवस्था परिवर्तन भई मूल्य महँगिएमा रू. ४ सय २१ मा प्रतिरोध पाउने र मूल्य सस्तिएमा रू. ३ सय ७६ मा टेवा पाउने देखिन्छ ।