रिडी हाइड्रोपावर : कम्पनी विश्लेषण (बिहीवार, बैशाख २६, २०७६)

May 9, 2019

लगानी कम्पनी विश्लेषण

आर्थिक अभियान गतवर्षको मुनाफाबाट ६ प्रतिशत बोसन शेयर वितरण गरी रू. ५३ करोड ११ लाख १८ हजार चुक्तापूँजी पु¥याएको रिडी हाइड्रोपावर डेभलपमेन्ट कम्पनीले चालू आर्थिक वर्षको चैत मसान्तसम्म रू. ७६ लाख ५१ हजार खुद नाफा कमाएको छ । यस अवधिमा कम्पनीले विद्युत् विक्रीबाट रू. १ करोड १५ लाख ९७ हजार आम्दानी गरेको छ । कम्पनीको जगेडा कोषमा रू. २ करोड ९६ लाख छ । दोस्रो बजारमा कम्पनीको शेयरमूल्य अंकित मूल्यभन्दा कम छ । बुधवारको कारोबारमा अघिल्लो दिनभन्दा ३ अंक घटेर अन्तिम मूल्य रू. ९४ कायम भएको छ । यस दिन कम्पनीको २५ हजार ७४६ कित्ता शेयर कारोबार भएको छ ।

कम्पनीको ६० दिनको कारोबार अवधिको मैनबत्ती विश्लेषणमा कालो मैनबत्ती अन्तिम बनेको छ । यस्तो मैनबत्तीले कम्पनीको शेयरमूल्य आगामी दिनमा घट्ने संकेत गर्छ । आरएसआई न्युट्रल जोन ४९ दशमलव ५२ विन्दुमा छ । यसले शेयर खरीदविक्री चाप सन्तुलनमा रहेकोे देखाउँछ । कम्पनीको स्ट्यान्डर्ड डेभिएशन १ दशमलव ८९ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा, १४ दिने औसत मूल्यरेखा र हालको मूल्यरेखा एकअर्कासँग जोडिएका छन् । बुधवारको शेयरमूल्य रू. ९४ देखि बजारको अवस्था परिवर्तन भई मूल्य महँगिएमा रू. ४ सय ९७ मा प्रतिरोध पाउने र मूल्य सस्तिएमा रू. ९० मा टेवा पाउने देखिन्छ ।