रिलायन्स फाइनान्स : कम्पनी विश्लेषण (बिहीवार, बैशाख २६, २०७६)

May 9, 2019

लगानी कम्पनी विश्लेषण

आर्थिक अभियान रिलायन्स फाइनान्स लिमिटेडले चालू आर्थिक वर्षको तेस्रो त्रैमासमा रू. २ करोड ७१ लाख ३६ हजार खुद नाफा कमाएको छ । गतवर्षको सोही अवधिमा कम्पनीले रू. १ करोड ७४ लाख ४२ हजार खुद नाफा कमाएको थियो । हाल कम्पनीको चुक्तापूँजी रू. ७४ करोड ३२ लाख २९ हजार छ भने जगेडा कोषमा रू. २६ करोड २८ लाख २८ हजार छ । यस त्रैमासमा कम्पनीले खराब कर्जा उठाउन सकेको छैन । गतवर्षको तेस्रो त्रैमासमा १ दशमलव ८५ प्रतिशत निष्क्रिय कर्जा रहेकोमा यस वर्ष ३ दशमलव ४३ प्रतिशत कायम भएको छ । बुधवारको कारोबारमा कम्पनीको अन्तिम शेयर मूल्य रू. ११८ कायम भएको छ । यस दिन कम्पनीको ८६३ कित्ता शेयर कारोबार भएको छ ।

कम्पनीको ६० दिनको कारोबार अवधिको मैनबत्ती विश्लेषणको अन्तिम दिनमा फोर प्राइस डोजी आकृति भएकोे मैनबत्ती बनेको छ । यस्तो मैनबत्तीले कम्पनीको शेयरमूल्य आगामी दिनमा बढ्ने अथवा घट्ने कुनै निश्चित संकेत गर्दैन । हाल लगानीकर्ताहरूमा ‘पर्ख र हेर’को स्थिति सृजना भएको छ । आरएसआई न्युट्रल जोन ४५ दशमलव ९२ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन शून्य दशमलव ४८ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग नजिकिएका छन् । हालको मूल्य यी दुई रेखाभन्दा माथि छ । बुधवारकोे शेयरमूल्य रू. ११८ देखि बजारको अवस्था परिवर्तन भई मूल्य महँगिएमा रू. ११९ मा प्रतिरोध पाउने र मूल्य सस्तिएमा रू. ११७ मा टेवा पाउने देखिन्छ ।