सगरमाथा इन्स्योरेन्स : सोमवार, ६ जेठ २०७६

आर्थिक अभियान

कम्पनीले पूँजीवृद्धिका लागि हाल कायम चुक्तापूँजीको ८६ प्रतिशत बोनस शेयर वितरण गर्ने प्रस्ताव गरेको छ । कम्पनीको वैशाख २६ गते बसेको सञ्चालक समितिको बैठकले उक्त प्रस्ताव गरेको हो । नियामक निकाय बीमा समितिबाट स्वीकृत भएपछि र कम्पनीको आगामी साधारणसभाबाट पारित भएपछि शेयरधनीले उक्त लाभांश पाउनेछन् । हाल कम्पनीको चुक्तापूँजी रू. ५३ करोड ८२ लाख छ । ८६ प्रतिशत बोनस शेयर वितरणपछि पूँजी रू. १ अर्ब पुग्नेछ । कम्पनीले आकर्षक लाभांश वितरण गर्ने प्रस्ताव गरेकाले शेयरमूल्य बढेको छ । बीमा समितिले निर्जीवन बीमा कम्पनीको चुक्तापूँजी रू. १ अर्ब पुर्‍याउन निर्देशन दिएसँगै कम्पनीले बोनस शेयर वितरण गरेर पूँजी वृद्धि गर्न लागेको हो । आइतवार कम्पनीको शेयर कारोबारमा खरीद चापको तुलनामा विक्री चाप बढी छ ।

कम्पनीको ५७ दिनको कारोबार अवधिको अन्तिम दिनमा टुप्पी र पुच्छर भएको कालो मैनबत्ती बनेको छ । यस्तो मैनबत्तीले कम्पनीको शेयरमूल्य आगामी दिनमा घट्ने संकेत गर्छ । आरएसआई न्युट्रल जोन ५४ दशमलव ४० विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन ३२ दशलमव शून्य ४ विन्दुमा छ । उतारचढाव न्यून छ । यस्तो अवस्थामा जोखिम कम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य १४ दिने औसत मूल्यरेखा र २६ दिने मूल्यरेखाको बीचमा छ । आइतवारको शेयरमूल्य रू. १ हजार ४ सय ३० देखि बजारको अवस्था परिवर्तन भई मूल्य महँगिएमा रू. १ हजार ५ सय ८१ मा प्रतिरोध पाउने र मूल्य सस्तिएमा रू. १ हजार ३ सय ५१ मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस