रैराङ हाइड्रोपावर : कम्पनी विश्लेषण (मंगलवार, ७ जेठ २०७६)

आर्थिक अभियान

यस कम्पनीको स्वामित्वमा धादिङ जिल्लामा ५०० किलोवाट क्षमताको रैराङ जलविद्युत् आयोजना २०६१ सालदेखि सञ्चालनमा छ । दोस्रो आयोजनाको रूपमा कम्पनीले ताप्लेजुङमा ९ हजार ९०० किलोवाट क्षमताको इवाखोला जलविद्युत् आयोजना पहिचान र सर्वेक्षण सम्पन्न गरी उक्त आयोजनाबाट उत्पादन हुने विद्युत् ३० वर्षका लागि नेपाल विद्युत् प्राधिकरणसँग खरीदविक्री गर्ने सम्झौता भइसकेको छ । यस आर्थिक वर्षको ९ महीनामा कम्पनीले विद्युत् विक्रीबाट रू. १० लाख ९० हजार आम्दानी गरेको छ । गतवर्ष कम्पनीले विद्युत् विक्रीबाट रू. १२ लाख ५२ हजार आम्दानी गरेको थियो । विद्युत् विक्री आम्दानी घटेसँगै कम्पनीको नाफामा पनि कमी आएको छ । यस अवधिमा कम्पनीको खुद नाफा रू. ११ लाख ७ हजार छ । यो नाफा गतवर्षको यसै अवधिमा रू. २७ लाख ८७ हजार थियो । हाल कम्पनीको चुक्तापूँजी रू. ५६ करोड छ । यस कम्पनीको शेयरमूल्य अंकित मूल्यभन्दा तल झरेको छ ।

कम्पनीको ६१ दिनको कारोबार अवधिको अन्तिम दिनमा इन्भर्टेड ह्याम्मर आकृति भएको मैनबत्ती बनेको छ । यस्तो आकृतिले आगामी दिनमा कम्पनीको शेयरमूल्य बुलिशमा रिभर्स हुने संकेत देखाउँछ । आरएसआई न्युट्रल जोन ४९ दशमलव शून्य ४ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन शून्य दशलमव ४८ विन्दुमा छ । उतारचढाव न्यून छ । यस्तो अवस्थामा जोखिम कम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग नजिकिएका छन् । हालको मूल्य १४ दिने औसत मूल्यरेखाभन्दा तल र २६ दिने मूल्यरेखासँग जोडिएको छ । सोमवारको शेयरमूल्य रू. ९३ देखि बजारको अवस्था परिवर्तन भई महँगिएमा रू. ९७ मा प्रतिरोध पाउने र सस्तिएमा रू. ९१ मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस