चिलिमे हाइड्रोपावर कम्पनी : कम्पनी विश्लेषण (आइतवार, १२ जेठ २०७६)

आर्थिक अभियान

चालू आवको तेस्रो त्रैमासमा कम्पनीले विद्युत् विक्रीबापत रू. ८० करोड ७५ लाख आम्दानी गरेको छ भने रू. ५४ करोड ३६ लाख नाफा कमाएको छ । गत आवको नाफाबाट शेयरधनीलाई २० प्रतिशत बोनस शेयर र ५ प्रतिशत नगद लाभांश वितरण गरेको हो । कम्पनीले २० प्रतिशत बोनस शेयर शेयरधनीको हितग्राही खातामा र ५ प्रतिशत नगद लाभांश बैंक खातामा जम्मा गरिदिएको छ । हाल कम्पनीको चुक्तापूँजी रू. ४ अर्ब ७५ करोड छ । रिजर्भ कोषमा रू. ४ अर्ब ५१ करोड छुट्ट्याएको छ । चिलिमे हाइड्रोपावरको सहायक कम्पनी रसुवागढी हाइड्रोपावर र सान्जेन जलविद्युत् कम्पनीले केही समय अगाडि सर्वसाधारणलाई आईपीओ जारी गरेका छन् । बिहीवार कम्पनीको शेयरमूल्य १५ अंक घटेर रू. ५ सय ३९ मा बन्द भएको छ । सो दिन कम्पनीको १० हजार ४ सय ३२ कित्ता शेयर खरीदविक्री भएको हो ।

कम्पनीको ६० दिनको कारोबार अवधिलाई लिएर गरिएको मैनबत्ती विश्लेषणमा अन्तिम दिन सामान्य डोजी आकृति बनेको छ । यस्तो आकृतिले कम्पनीको शेयरमूल्य घट्ने–बढ्ने कुनै पनि निश्चित संकेत देखाउँदैन । यस्तो अवस्थामा कम्पनीको आधारभूत पक्ष हेरेर लगानी गरेमा राम्रो प्रतिफल पाउन सकिन्छ । आरएसआई न्युट्रल जोन ५४ दशमलव ६६ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन १० दशमलव ७५ विन्दुमा छ । उतारचढाव न्यून रहेको छ । यस्तो अवस्थामा कम जोखिम हुन्छ भने प्रतिफल पनि कम हुने गर्दछ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत एकअर्कासँग नजीकिएका छन् । हालको मूल्य यी दुई रेखाभन्दा माथि छ । बिहीवारको शेयरमूल्य रू. ५ सय ३९ देखि बजारको अवस्था परिवर्तन भई महँगिएमा रू. ५ सय ५४ मा प्रतिरोध पाउने र सस्तिएमा रू. ५ सय २५ मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस