नेपाल बंगलादेश बैंक : कम्पनी विश्लेषण (मंगलवार, १४ जेठ २०७६)

May 28, 2019

लगानी कम्पनी विश्लेषण

आर्थिक अभियान बैंकले जेठ १० गतेदेखि १० दशमलव २५ प्रतिशत ब्याजदरमा २० लाख कित्ता ऋणपत्र विक्री गरिरहेको छ । बैंकले २० लाखमध्ये ८ लाख कित्ता सर्वसाधारणका लागि र १२ लाख कित्ता ऋणपत्र व्यक्तिगत संघ संस्थालाई विक्री खुला गरेको हो । ऋणपत्र निष्कासन बन्द मिति छिटोमा जेठ १४ सम्म र ढिलोमा असार ८ गतेसम्म रहेको छ । आवेदकले न्यूनतम २५ कित्ता र अधिकतम १ लाख कित्ताका लागि आवेदन दिन सक्छन् । निष्कासन तथा विक्रीप्रबन्धकमा नबिल इन्भेष्टमेन्ट बैंकिङ लिमिटेड छ । ऋणपत्रमा लगानी गर्ने इच्छुक लगानीकर्ताले विक्रीप्रबन्धकका साथै सीआस्बा सेवामा सहभागी बैंक तथा वित्तीय संस्था र तिनका शाखा कार्यालयबाट आवेदन गर्न सक्छन् । बैंकले चालू आवको तेस्रो त्रैमासमा रू. १ अर्ब १४ करोड नाफा कमाएको छ । यो नाफा गत आवको सोही अवधिको तुलनामा ५४ प्रतिशत बढी हो । सो अवधिमा बैंकले रू. ७३ करोड ८० लाख नाफा कमाएको थियो ।

कम्पनीको ६१ दिनको कारोबार अवधिलाई लिएर गरिएको मैनबत्ती विश्लेषणमा अन्तिम दिनमा ओपनिङ सेतो मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा बढ्ने संकेत गर्छ । आरएसआई न्युट्रल जोन ५१ दशमलव ३१ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन १ दशमलव ४६ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत एकअर्कासँग नजिकिएका छन् । हालको मूल्य यी दुई रेखाभन्दा तल छ । सोमवारको शेयरमूल्य रू. २२५ देखि बजारको अवस्था परिवर्तन भई मूल्य महँगिएमा रू. २३६ मा प्रतिरोध पाउने र मूल्य सस्तिएमा रू. २११ मा टेवा पाउने देखिन्छ ।