श्री इन्भेष्टमेन्ट एन्ड फाइनान्स : कम्पनी विश्लेषण (सोमवार, २० जेठ २०७६)

(अस)

वित्त कम्पनीहरूका लागि नेपाल राष्ट्र बैंकले तोकेबमोजिम चुक्तापूँजी पुर्‍याइसकेको यस कम्पनीले गतवर्षको मुनाफाबाट १ दशमलव २३ प्रतिशत बोनस र ८ दशमलव ७७ प्रतिशत नगद लाभांश गरी १० प्रतिशत लाभांश वितरण गरेको छ । राष्ट्रिय स्तरको यस वित्तीय संस्थाले हाल केन्द्रीय कार्यालयसहित १३ शाखा कार्यालयमार्फत सेवा प्रदान गर्दै आएको छ । गतवर्षको तेस्रो त्रैमासमा रू. ६ करोड ४९ लाख ९९ हजार खुद नाफा आर्जन गरेको यस कम्पनीले यस वर्ष भने सोही अवधिमा रू. ९ करोड ५७ लाख ३४ हजार नाफा आर्जन गर्न सफल भएको छ । गतवर्ष रू. ९ करोड ९३ लाख १० हजार रहेको सञ्चालन मुनाफा यस वर्ष रू. १४ करोड ९२ लाख ५६ हजार पुगेको छ । हाल कम्पनीको चुक्तापूँजी रू. ८१ करोड छ भने जगेडा कोष रकम रू. २५ करोड ६० लाख १० हजार छ । कम्पनीले यस वर्षको तेस्रो त्रैमाससम्म रू. ४ अर्ब ४२ करोड ३३ लाख २९ हजार निक्षेप संकलन गरेको छ भने रू. ४ अर्ब १० करोड १९ लाख २५ हजार कर्जा प्रवाह गरेको छ ।

कम्पनीको ६२ दिनको कारोबार अवधिको अन्तिम दिनमा कालो मैनबत्ती आकृति बनेको छ । यस्तो आकृतिले कम्पनीको शेयरमूल्य आगामी दिनमा घट्ने संकेत गर्छ । आरएसआई न्युट्रल जोन ५७ दशमलव ७४ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । स्ट्यान्डर्ड डेभिएशन १ दशमलव ४६ विन्दुमा छ । उतारचढाव न्यून छ । यस्तो अवस्थामा जोखिम कम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य १४ दिने औसत मूल्यरेखा र २६ दिने औसत मूल्यरेखाभन्दा माथि छ । आइतवारको शेयरमूल्य रू. १५८ देखि बजारको अवस्था परिवर्तन भई मूल्य महँगिएमा रू. १६९ मा प्रतिरोध पाउने र मूल्य सस्तिएमा रू. १५३ मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस