नेपाल दूरसञ्चार कम्पनी : कम्पनी विश्लेषण (बुधवार, ११ वैशाख २०७६)

(अस)

गतवर्षको सञ्चित मुनाफाबाट शेयरधनीका लागि प्रतिशेयर रू. ५५ का दरले नगद लाभांश दिएको यस कम्पनीको चुक्तापूँजी हाल रू. १५ अर्ब छ । कम्पनीले चालू आर्थिक वर्षको तेस्रो त्रैमासमा जगेडा कोषमा रू. ८६ अर्ब ४० करोड ८२ लाख ४२ हजार छुट्याएको छ । गतवर्षको तेस्रो त्रैमाससम्ममा रू. ३३ अर्ब ८५ करोड ३२ लाख ७० हजार कुल आम्दानी गरेको कम्पनीले यस वर्ष सोही अवधिमा रू. ३२ अर्ब ४७ करोड ५८ लाख ८ हजार आम्दानी गरेको छ । कुल आम्दानीमा कमी आएसँग कम्पनीको नाफामा असर परेको छ । गतवर्ष रू. ११ अर्ब ८५ करोड ६४ लाख ६ हजार खुद नाफा आर्जन गरेको कम्पनीले यस वर्ष रू. ९ अर्ब ९८ करोड ३९ लाख २५ हजार मात्र खुद नाफा कमाएको छ । कम्पनीको प्रतिशेयर आम्दानी वार्षिक ८८ रुपैयाँ ७५ पैसा छ । सोमवारको शेयर कारोबारमा कम्पनीको शेयरमूल्य अघिल्लो दिनभन्दा २ अंक घटेर रू. ७१५ कायम भएको छ ।

कम्पनीको ६२ दिनको कारोबार अवधिको अन्तिम दिनमा ओपनिङ ब्ल्याक मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा घट्ने संकेत गर्छ । आरएसआई न्युट्रल जोन ४९ दशमलव १२ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । स्ट्यान्डर्ड डेभिएशन ६ दशमलव ६३ विन्दुमा छ । उतारचढाव न्यून छ । यस्तो अवस्थामा जोखिम कम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य १४ दिने औसत मूल्यरेखा र २६ दिने औसत मूल्यरेखाभन्दा तल छ । सोमवारको शेयरमूल्य रू. ७१५ देखि बजारको अवस्था परिवर्तन भई मूल्य महँगिएमा रू. ७३१ मा प्रतिरोध पाउने र मूल्य सस्तिएमा रू. ७०१ मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस