माछापुच्छ्रे बैंक : कम्पनी विश्लेषण (बुधवार, २२ जेठ २०७६)

Jun 5, 2019

लगानी कम्पनी विश्लेषण

(अस) बैंकले ३० लाख कित्ता ऋणपत्र जारी गर्न नियामक निकाय नेपाल धितोपत्र बोर्डमा निवेदन दिएको छ । बैंकले बोर्डमा २०७५ चैत २७ गते निवेदन दिएको हो । ३० लाख कित्तामध्ये १२ लाख कित्ता सर्वसाधारणका लागि र १८ लाख कित्ता ऋणपत्र व्यक्तिगत संघसंस्थालाई विक्री गर्नेछ । बैंकले १० दशमलव २५ प्रतिशत ब्याजदरमा २०८५ सम्मका लागि ऋणपत्र जारी गर्न सेबोनमा निवेदन दिएको हो । विक्रीप्रबन्धकमा एनएमबी क्यापिटल लिमिटेड छ । बैंकले चैत मसान्तसम्ममा रू. १ अर्ब २४ करोड नाफा कमाएको छ । यो नाफा गत आवको सोही अवधिको तुलनामा ४५ प्रतिशत बढी हो । सो अवधिमा बैंकले रू. ८५ करोड ४० लाख नाफा कमाएको थियो । बैंकको वितरणयोग्य नाफा रू. ९८ करोड १८ लाख छ । मंगलवारको शेयर कारोबारमा बैंकको शेयरमूल्य अघिल्लो दिनभन्दा २ अंक बढेर रू. २६७ कायम भएको छ ।

कम्पनीको ६३ दिनको कारोबार अवधिको अन्तिम दिनमा पुच्छर भएको कालो मैनबत्ती आकृति बनेको छ । यस्तो आकृतिले कम्पनीको शेयरमूल्य घट्ने संकेत गर्छ । आरएसआई न्यूट्रल जोन ५१ दशमलव ४७ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । स्ट्यान्डर्ड डेभिएशन ४ दशमलव ५७ विन्दुमा छ । उतारचढाव न्यून छ । यस्तो अवस्थामा जोखिम कम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग नजिकिएका छन् । १४ दिने औसत मूल्यरेखा र २६ दिने औसत मूल्यरेखाभन्दा हालको मूल्य तल छ । मंगलवारको शेयरमूल्य रू. २६७ देखि बजारको अवस्था परिवर्तन भई मूल्य महँगिएमा रू. २७८ मा प्रतिरोध पाउने र मूल्य सस्तिएमा रू. २६५ मा टेवा पाउने देखिन्छ ।