डिप्रोक्स लघुवित्त : कम्पनी विश्लेषण (बिहीवार, २३ जेठ २०७६)

आर्थिक अभियान

डिप्रोक्स लघुवित्त वित्तीय संस्था लिमिटेडले गत आवको नाफाबाट शेयरधनीलाई १० प्रतिशत बोनस शेयर वितरण गरेको छ । कम्पनीले चालू आवको ९ महीनामा रू. २८ करोड ७२ लाख खुद नाफा कमाएको छ । कम्पनीको नाफा गत आवको सोही अवधिको तुलनामा ६२ प्रतिशत बढी हो । कम्पनीले २५ प्रतिशत खराब कर्जा संकलन गरेको छ भने खुद ब्याज आम्दानी र सञ्चालन मुनाफा बढाएपछि नाफा बढेको हो । कम्पनीको बोनस वितरणपछि चुक्तापूँजी रू. ७७ करोड ३४ लाख पुगेको छ । कम्पनीको प्रतिशेयर आम्दानी वार्षिक रू. ४९ दशमलव ५२ छ । कम्पनीको प्रतिशेयर किताबी मूल्य रू. १८३ दशमलव ११ छ भने तरलता अनुपात ७ दशमलव ८८ प्रतिशत छ । कम्पनीले समीक्षा अवधिमा ७१ ओटा जिल्लामा ११९ शाखा कार्यालय खोली थप सेवासुविधा प्रदान गर्ने योजना लिएको छ ।

कम्पनीको ६२ दिनको कारोबार अवधिको अन्तिम दिनमा कालो मारुबोजु आकृति बनेको छ । यस्तो आकृतिले कम्पनीको शेयरमूल्य घट्ने संकेत देखाउँछ । आरएसआई न्युट्रल जोन ४२ दशमलव ७० विन्दुमा छ । यसले शेयर खरीदविक्री चाप सन्तुलनमा रहेको देखाउँछ । स्ट्यान्डर्ड डेभिएशन १० दशमलव ५७ विन्दुमा छ । उतारचढाव न्यून छ । यस्तो अवस्थामा जोखिम कम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग नजिकिएका छन् । १४ दिने औसत मूल्यरेखा र २६ दिने औसत मूल्यरेखाभन्दा हालको मूल्य तल छ । मंगलवारको शेयरमूल्य रू. ६९९ देखि बजारको अवस्था परिवर्तन भई मूल्य महँगिएमा रू. ७३० मा प्रतिरोध पाउने र मूल्य सस्तिएमा रू. ५९३ मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस