महुली सामुदायिक लघुवित्त : कम्पनी विश्लेषण (आइतवार, २६ जेठ २०७६)

आर्थिक अभियान

गत आवको नाफाबाट शेयरधनीलाई २० प्रतिशत बोनस शेयर वितरण गरेको महुली सामुदायिक लघुवित्त वित्तीय संस्था लिमिटेडले चालू आवको ९ महीनामा रू. २ करोड ८७ लाख नाफा कमाएको छ । कम्पनीको नाफा गत आवको तुलनामा १९ प्रतिशत बढेको हो । कम्पनीले ५० प्रतिशत हकप्रद र २० प्रतिशत बोनस शेयर वितरण गरेपछि चुक्तापूँजी गत आवको तुलनामा ७० प्रतिशत बढेको हो । गतवर्ष रू. ६ करोड रहेको चुक्तापूँजी यस वर्ष रू. १० करोड २० लाख पुगेको छ । कम्पनीको खुद ब्याज आम्दानी र सञ्चानल मुनाफा बढेपछि नाफा बढेको हो । कम्पनीले रू. ३९ लाख ७३ हजार खराब कर्जा संकलन गर्दा नाफा बढ्न सहयोग पुगेको छ । खराब कर्जा संकलनपछि कम्पनीको निष्क्रिय कर्जा १ दशमलव ७४ प्रतिशतबाट घटेर १ दशमलव ६९ मा आएको छ । कम्पनीले आगामी योजनामा वित्तीय पँहुच नपुगेका स्थानहरूमा शाखा कार्यालय स्थापना गर्ने रहेको छ । छैटौं वार्षिक साधारणसभाबाट राष्ट्रिय स्तरको बन्ने तयारी भएको कम्पनीले जानकारी दिएको छ । चालू आवको तेस्रो त्रैमासमा कम्पनीको प्रतिशेयर आम्दानी वार्षिक रू. ३७ दशमलव ५३ छ भने प्रतिशेयर नेटवर्थ रू. २७७ दशमलव ३६ छ ।

कम्पनीको ६२ दिनको कारोबार अवधिको अन्तिम दिन कालो मैनबत्ती भएको आकृति बनेको छ । यस्तो आकृतिले कम्पनीको शेयरमूल्य घट्ने संकेत देखाउँछ । विश्वसनीयता भने सामान्य छ । आरएसआई न्यूट्रल जोन २२ दशमलव ७७ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । स्ट्यान्डर्ड डेभिएशन ३६ दशमलव ८१ विन्दुमा छ । उतारचढाव न्यून छ । यस्तो अवस्थामा जोखिम कम हुन्छ भने प्रतिफल पनि कम हुने गर्छ । त्यस्तै कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । १४ दिने औसत मूल्यरेखा र २६ दिने औसत मूल्यरेखाभन्दा हालको मूल्य तल छ । कम्पनीको शेयरमूल्य २ महीनायताकै न्यून रहेकाले कतिमा टेवा पाउँछ भन्न सकिँदैन ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस