छिमेक लघुवित्त वित्तीय संस्था : कम्पनी विश्लेषण (बुधवार, २९ जेठ २०७६)

आर्थिक अभियान

छिमेक लघुवित्त वित्तीय संस्थाले गत आवको नाफाबाट शेयरधनीहरूलाई १८ प्रतिशत बोनस शेयर र २२ प्रतिशत नगद लाभांश वितरण गरेको छ । कम्पनीको वैशाख ३० गते सम्पन्न सभाले सो लाभांश पारित गरेको हो । कम्पनीले ९ महीनामा रू. ६४ करोड ३० लाख नाफा कमाएको छ । यो गत आवको तुलनामा ७९ प्रतिशत बढी हो । कम्पनीले गत आवको सोही अवधिमा रू. ३५ करोड ८१ लाख नाफा कमाएको थियो । कम्पनीले खुद ब्याज आम्दानी ३५ प्रतिशत र सञ्चालन मुनाफा ७४ प्रतिशत बढाएपछि नाफा बढेको छ । कम्पनीले तेस्रो त्रैमासमा रू. ६६ लाख २१ हजार खराब कर्जा संकलन गरेको छ । कम्पनीको चुक्तापूँजी रू. १ अर्ब पुगेको छ । कम्पनीको निष्क्रिय कर्जा शून्य दशमलव २६ प्रतिशत छ । कम्पनीको प्रतिशेयर आम्दानी रू. ८५ दशमलव ७४ छ । प्रतिशेयर नेटवर्थ रू. २८१ दशमलव १४ र तरलता अनुपात २० दशमलव ५४ प्रतिशत छ ।

कम्पनीको ६० दिनको कारोबार अवधिको अन्तिम ५ दिनमा ह्याम्मर आकृति भएको मैनबत्ती बनेको छ । यस्तो आकृतिले कम्पनीको शेयरमूल्य अन्तिम दिनमा टेवा पाएर माथि जान खोजेको देखिन्छ । आरएसआई न्युट्रल जोन ४३ दशमलव २३ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन २ सय शून्य ५ विन्दुमा छ । उतारचढाव न्यून छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग नजिकिएका छन् । हालको मूल्यरेखा १४ दिने औसत मूल्यरेखा र २६ दिने मूल्यरेखा दुवैभन्दा तल छ । मंगलवारको शेयरमूल्य रू. ९३९ देखि बजार अवस्था परिवर्तन भई शेयरमूल्य बढेमा रू. ९५६ मा प्रतिरोध पाउने र घटेमा रू. ९३९ मा नै टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस