सांग्रिला डेभलपमेन्ट बैंक : कम्पनी विश्लेषण (आइतवार, १ असार २०७६)

Jun 16, 2019

लगानी कम्पनी विश्लेषण

आर्थिक अभियान चालू आवको चैत मसान्तसम्ममा बैंकले रू. २३ करोड १८ लाख नाफा कमाएको छ । सो अवधिमा बैंकको चुक्तापूँजी रू. २ अर्ब ६० करोड छ भने रिजर्भ कोषमा रू. ५८ करोड ३३ लाख छुट्याएको छ । चैत मसान्तसम्ममा बैंकले रू. २० अर्ब १३ करोड निक्षेप संकलन गरेको छ भने रू. १८ अर्ब २४ करोड कर्जा भएको छ । गत आवको सोही अवधिको तुलनामा निक्षेप ३६ प्रतिशत र कर्जा प्रवाह ३० प्रतिशत वृद्धि भएको हो । प्रतिशेयर आम्दानी रू. ११ दशमलव ८६, मूल्य आम्दानी अनुपात ११ दशमलव ९७ र प्रतिशेयर नेटवर्थ रू. १ सय २२ दशमलव ३८ छ । बिहीवार कम्पनीको शेयरमूल्य रू. १ सय ५० कायम भएको छ । सो दिन बैंकको १० हजार ८४१ कित्ता शेयर खरीदविक्री भएको हो ।

कम्पनीको ६० दिनको कारोबार अवधिको अन्तिम दिनमा लङ्गलेग्ड डोजी डोजी आकृति बनेको छ । यस्तो आकृतिले कम्पनीको शेयरमूल्य आगामी दिनमा बढ्ने र घट्नेमा अन्योल देखाउँछ । यस्तो अवस्थामा कम्पनीको आधारभूत पक्ष हेरेर लगानी गरेमा राम्रो प्रतिफल पाउन सकिन्छ । यो अवस्थामा लगानीकर्तामा ‘पर्ख र हेर’को अवस्था सृजना भएको छ । आरएसआई न्यूट्रल जोन ४६ दशमलव १२ विन्दुमा छ । यसले शेयर खरीद विक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन ४ दशमलव ३८ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य यी दुई रेखाभन्दा तल छ । बिहीवारको शेयरमूल्य रू. १५० देखि बजारको अवस्था परिवर्तन भई महँगिएमा रू. १५४ मा प्रतिरोध र सस्तिएमा रू. १४६ मा टेवा पाउने देखिन्छ ।