एनएमबी माइक्रोफाइनान्स वित्तीय संस्था : कम्पनी विश्लेषण (बुधवार, ४ असार २०७६)

आर्थिक अभियान

एनएमबी बैंकको सहायक कम्पनीको रूपमा रहेको एनएमबी माइक्रोफाइनान्स वित्तीय संस्थाले गतवर्ष समेतको मुनाफाबाट १५ प्रतिशत बोनस शेयर वितरण गरेको छ । हाल कम्पनीको चुक्तापूँजी रू. १६ करोड २० लाख ६ हजार पुगेको छ । कम्पनीले कर प्रयोजनका लागि शून्य दशमलव ७९ प्रतिशत नगद लाभांश समेत वितरण गरेको छ । गत पुसमा सम्पन्न साधारणसभाले कम्पनीको पूँजीवृद्धिका लागि १२५ प्रतिशत हकप्रद जारी गर्ने प्रस्ताव पारित गरेको छ । आगामी दिनमा वित्तीय पहुँच कम भएका थप जिल्लामा शाखा विस्तार गर्ने कम्पनीको योजना छ । हाल कम्पनीले ५४ जिल्लामा १ सयओटा शाखा तथा उपशाखा कार्यालयमार्फत लघुवित्त सेवा प्रदान गर्दै आएको छ । कम्पनीले चैत मसान्तसम्म रू. ३ करोड ३२ लाख ८१ हजार खुद नाफा आर्जन गरेको छ । यो नाफा गतवर्षको सोही अवधिको तुलनामा ५२ दशमलव ६२ प्रतिशत बढी हो ।

कम्पनीको ६० दिनको कारोबार अवधिको अन्तिम दिनमा सामान्य डोजी आकृति बनेको छ । यस्तो आकृतिले कम्पनीको शेयरमूल्य आगामी दिनमा घट्ने अथवा बढ्ने कुनै पनि निश्चित संकेत देखाउँदैन । यस्तो अवस्थामा कम्पनीको आधारभूत पक्ष हेरेर लगानी गरेमा राम्रो प्रतिफल पाउन सकिन्छ । आरएसआई न्युट्रल जोन ३५ दशमलव ७९ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन २१ दशमलव ८७ विन्दुमा छ । उतारचढाव न्यून छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग नजिकिएका छन् । हालको मूल्यरेखा २६ दिने औसत मूल्यरेखा र १४ दिने औसत मूल्यरेखाभन्दा तल छ । मंगलवारको शेयरमूल्य रू. ९५० देखि बजारको अवस्था परिवर्तन भई मूल्य महँगिएमा रू. १००० मा प्रतिरोध पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस