सिटी एक्सप्रेस फाइनान्स : कम्पनी विश्लेषण (बिहीवार, ५ असार २०७६)

Jun 20, 2019

लगानी कम्पनी विश्लेषण

Kishwor Bam कम्पनीले २०७४ मङ्सिर २४ गतेदेखि समस्याग्रस्त अवस्थाबाट मुक्त भएपछि निक्षेप फिर्ता भुक्तानी तथा पुरानो कर्जा असुलीको कार्यलाई निरन्तरता दिइरहेको छ । व्यवसाय वृद्धिका लागि समेत आन्तरिक गृहकार्यमा लागेकाले मौज्दात, कर्जा प्रवाह असुली केही बढेको कम्पनीले तेस्रो त्रैमासिक वित्तीय विवरणमा उल्लेख गरेको छ । कम्पनीको प्रतिशेयर आम्दानी रू. ३ दशमलव १६ र प्रतिशेयर नेटवर्थ रू. ५३ दशमलव २१ छ । चैत मसान्तसम्ममा कम्पनीको चुक्तापूँजी रू. ४० करोड २१ लाख छ । सो अवधिमा कम्पनीले रू. ९४ लाख ९५ हजार नाफा कमाएको छ भने रू. ३ करोड ९६ लाख खराब कर्जा उठाएको छ । खराब कर्जा संकलन बढेकाले निष्क्रिय कर्जा १ सय प्रतिशतबाट घटेर ९ दशमलव ५८ प्रतिशतमा झरेको छ । कारोबार भएको ४८ दिनमा कम्पनीको शेयरमूल्य अधिकतम रू. १०७ र न्यूनतम रू. ९६ पुगेको छ । बुधवारको शेयर कारोबारमा कम्पनीको खरीद गर्ने मात्र माग छ ।

कम्पनीको ४७ दिनको कारोबार अवधिको अन्तिम दिनमा फोर प्राइस डोजी आकृति बनेको छ । यस्तो आकृतिले कम्पनीको शेयरमूल्य घट्ने अथवा बढ्ने कुनै पनि निश्चित संकेत देखाउँदैन । यस्तो अवस्थामा कम्पनीको आधारभूत पक्ष हेरेर लगानी गरेमा राम्रो प्रतिफल पाउन सकिन्छ । आरएसआई न्युट्रल जोन ४८ दशमलव ५८ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन १ दशमलव २ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य यी दुई रेखाभन्दा तल छ । बुधवारको शेयरमूल्य रू. १०० देखि बजारको अवस्था परिवर्तन भई मूल्य महँगिएमा रू. १०२ मा प्रतिरोध पाउने र मूल्य सस्तिएमा रू. ९६ मा टेवा पाउने देखिन्छ ।