ग्लोबल आईएमई लघुवित्त : कम्पनी विश्लेषण (बिहीवार, ५ असार २०७६)

Jun 20, 2019

लगानी कम्पनी विश्लेषण

Kishwor Bam कम्पनीले ४५ जिल्लामा ६३ ओटा शाखा कार्यालयबाट ७४ हजार ३७३ जना सदस्यलाई लघुवित्त सेवा प्रदान गर्दै आएको छ । यो ग्लोबल आईएमई बैंकको सहायक कम्पनी हो । लघुवित्तमा ग्लोबल आईएमई बैंकको ७० प्रतिशत शेयर छ । कम्पनीले चैत मसान्तसम्ममा रू. ४ करोड ८ लाख नाफा कमाएको छ । यो नाफा गत आवको सोही अवधिको तुलनामा २५५ प्रतिशत बढी हो । गत आवको सोही अवधिको तुलनामा कम्पनीले रू. १ करोड १४ लाख नाफा कमाएको थियो । चैत मसान्तसम्ममा कम्पनीको खुद ब्याज आम्दानी १३९ प्रतिशत र सञ्चालन नाफा २३६ प्रतिशत बढेकाले नाफामा वृद्धि भएको हो । कम्पनीको चुक्तापूँजी १५ प्रतिशत बढेर रू. ११ करोड ४ लाख पुगेको छ । १५ प्रतिशत बोनस शेयर वितरणपछि पूँजीवृद्धि भएको हो । प्रतिशेयर आम्दानी (वार्षिक) रू. ४९ दशमलव २८ छ । बुधवारको कारोबार अवधिमा खरीद चापभन्दा विक्री चाप बढी छ ।

कम्पनीको ५६ दिनको कारोबार अवधिको अन्तिम दिनमा सेतो मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा बढ्ने संकेत देखाउँछ । आरएसआई न्युट्रल जोन ४१ दशमलव ५९ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन ३४ दशमलव १४ विन्दुमा छ । उतारचढाव न्यून छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य यी दुई रेखाभन्दा तल छ । बुधवारको शेयरमूल्य रू. १ हजार १९५ देखि बजारको अवस्था परिवर्तन भई मूल्य महँगिएमा रू. १ हजार २६८ मा प्रतिरोध पाउने र मूल्य सस्तिएमा रू. १ हजार १२८ मा टेवा पाउने देखिन्छ ।