अरुण काबेली पावर : कम्पनी विश्लेषण (मंगलवार, १० असार २०७६)

Jun 25, 2019

लगानी कम्पनी विश्लेषण

Kishwor Bam कम्पनीले चालू आवको तेस्रो त्रैमासमा रू. १५ करोड नाफा कमाएको छ । चुक्तापूँजी रू. १ अर्ब ५० करोड रहेको कम्पनीले रिजर्भ कोषमा रू. १ करोड ५३ लाख छुट्याएको छ । नेपाल स्टक एक्सचेन्ज लिमिटेडमा १ करोड ५० लाख कित्ता शेयर सूचीकृत रहेको अरुण कावेली पावर लिमिटेडको बजार पूँजीकरण भने रू. २ अर्ब ७० करोड छ । कम्पनीले व्यावसायिक योजनाअनुरूप २५ मेगावाट क्षमताको काबेली बी—१ जलविद्युत् आयोजना निर्माण गरिरहेको छ । निकट भविष्यमा नै आयोजना निर्माण सम्पन्न हुने कम्पनीले प्रकाशित वित्तीय विवरणमा उल्लेख गरेको छ । सोमवारको कारोबारमा कम्पनीको अन्तिम शेयरमूल्य आइतवारको भन्दा १० अंक बढेर रू. १९० कायम भएको छ । यस दिनको कारोबारमा कम्पनीको शेयरमूल्य न्यूनतम रू.१८० देखि अधिकतम रू. १९० सम्म पुगेको छ ।

कम्पनीको ६१ दिनको कारोबार अवधिलाई लिएर गरिएको मैनबत्ती विश्लेषणमा अन्तिम दिनमा सेतो मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा बढ्ने संकेत गर्छ । आरएसआई न्युट्रल जोन ५२ दशमलव शून्य ९ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन ४ दशमलव १९ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत एकअर्कासँग टाढिएका छन् । हालको मूल्य १४ दिने औसत मूल्यरेखाभन्दा माथि र २६ दिनेभन्दा तल छ । सोमवारको शेयरमूल्य रू. १९० देखि बजारको अवस्था परिवर्तन भई मूल्य महँगिएमा रू. २१७ मा प्रतिरोध पाउने र मूल्य सस्तिएमा रू. १८० मा टेवा पाउने देखिन्छ ।