सानिमा बैंक : कम्पनी विश्लेषण (शुक्रवार, २० असार २०७६)

Jul 5, 2019

लगानी कम्पनी विश्लेषण

आर्थिक अभियान गतवर्षको असार २१ गते सानिमा बैंकको शेयरमूल्य प्रतिकित्ता रू. ३३५ मा कारोबार भएको थियो । १ वर्षको अवधिमा कम्पनीको शेयरमूल्यमा निकै उतारचढाव आएको छ । कम्पनीको शेयरमूल्य १ वर्षमा प्रतिकित्ता न्यूनतम रू. २९१ र उच्चतम रू. ३६५ सम्म पुगेको छ । २०७५ असार १० गते कम्पनीको शेयरमूल्य रू. ३५१ कायम छ । कम्पनीले गत आवको नाफाबाट शेयरधनीलाई १४ प्रतिशत नगद लाभांश वितरण गरेको छ । कम्पनी हाल मर्जरको खोजीमा छ । बैंकले चालू आवको तेस्रो त्रैमासमा रू. १ अर्ब ५७ करोड नाफा कमाएको छ । हाल बैंकको चुक्तापूँजी रू. ८ अर्ब छ । तेस्रो त्रैमाससम्ममा बैंकको वितरणयोग्य नाफा रू. १ अर्ब ११ करोड छ । प्रतिशेयर आम्दानी रू. २६ दशमलव ५२, मूल्य आम्दानी अनुपात ११ दशमलव ९९ र प्रतिशेयर नेटवर्थ रू. १४० दशमलव ३२ छ ।

कम्पनीको ५५ दिनको कारोबार अवधिको अन्तिम ३ दिनमा सेतो टुप्पी भएको मैनबत्ती बनेको छ । यस्तो आकृतिले कम्पनीको शेयरमूल्य बढ्ने संकेत गर्छ । आरएसआई न्युट्रल जोन ५३ दशमलव ४० विन्दुमा छ । यसले शेयर खरीदविक्री चाप सन्तुलनमा रहेको देखाउँछ । स्ट्यान्डर्ड डेभिएशन १ दशमलव ७८ विन्दुमा छ । उतारचढाव न्यून छ । यस्तो अवस्थामा जोखिम कम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग जोडिएका छन् । २६ दिने औसत मूल्यरेखा र १ दिने मुल्यरेखा एकआपसमा जोडिएका छन् भने १४ दिने औसत मूल्यरेखा थोरै तल छ । हालको मूल्य यी दुई रेखाभन्दा थोरै माथि गएको छ । यसले आइतवार मूल्य बढ्ने संकेत गर्छ । बिहीवारको शेयरमूल्य रू. ३५१ देखि बजारको अवस्था परिवर्तन भई मूल्य महँगिएमा रू. ३५९ मा प्रतिरोध पाउने र मूल्य सस्तिएमा रू. ३४६ मा टेवा पाउने देखिन्छ ।