समिट माइक्रोफाइनान्स : कम्पनी विश्लेषण (शुक्रवार, २० असार २०७६)

आर्थिक अभियान

गतवर्षको असार २१ गते समिट माइक्रोफाइनान्स वित्तीय संस्थाको शेयरमूल्य प्रतिकित्ता रू. १ हजार ५ थियो । १ वर्षको अवधिमा सोही दिन शेयरमूल्य सबैभन्दा बढी पुगेको थियो । कम्पनीको शेयरमूल्य प्रतिकित्ता रू. १ हजारदेखि ओरालो लाग्दै हाल प्रतिकित्ता रू. ५३० मा आइपुगेको छ । कम्पनीले एक आवमा शेयरधनीलाई २३ दशमलव ५३ प्रतिशत बोनस शेयर वितरण गरेको छ । कम्पनीले साउन ४ गते विशेष साधारणसभाको आयोजना गर्ने भएको छ । सभामा अन्य संस्थासँग मर्जरमा जाने र मर्जरपछि कम्पनीले शतप्रतिशत हकप्रद शेयर जारी गर्ने प्रस्ताव गरेको छ । सोही कारण यस दिन कम्पनीको शेयरमूल्यमा सकारात्मक सर्किट ब्रेक लागेको छ । कम्पनीले चालू आवको ९ महीनामा रू. ४ करोड २८ लाख नाफा कमाएको छ । कम्पनीको चुक्तापूँजी रू. २१ करोड छ । कम्पनीको प्रतिशेयर आम्दानी रू. २० दशमलव ४०, मूल्य आम्दानी अनुपात ३१ दशमलव ३७, तरलता अनुपात १३ दशमलव ७४ र प्रतिशेयर नेटवर्थ रू. १४२ दशमलव शून्य ४ छ ।

कम्पनीको ५५ दिनको कारोबार अवधिको अन्तिम दिनमा सेतो मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा बढ्ने संकेत देखाउँछ । आरएसआई न्युट्रन जोन ५१ दशमलव २५ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन १८ दशमलव २२ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र हालकोे मूल्यरेखा एकआपसमा जोडिएका छन् । १४ दिनको मूल्यरेखा २६ दिने औसत मूल्यरेखा र हाल मूल्यरेखाको बीचमा छ । १४ दिने रेखाले हालको मूल्यलाई तलबाट काटेको छ । बिहीवारको शेयरमूल्य रू. ५३० देखि बजारको अवस्था परिवर्तन भई मूल्य महँगिएमा रू. ५५० मा प्रतिरोध पाउने र सस्तिएमा रू. ४८० मा टेवा पाउने देखिन्छ ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस