सूर्योदय लघुवित्त : कम्पनी विश्लेषण (शुक्रवार, २० असार २०७६)

Jul 5, 2019

लगानी कम्पनी विश्लेषण

आर्थिक अभियान गतवर्षको असार २१ गते सूर्योदय लघुवित्त वित्तीय संस्थाको शेयरमूल्य प्रतिकित्ता रू. १ हजार ५९० मा कारोबार भएको थियो । १ वर्षको अवधिमा कम्पनीको शेयरमूल्य प्रतिकित्ता अधिकतम रू. १ हजार ७८६ पुगेको थियो । कम्पनीले शेयरधनीका लागि ४२ दशमलव ७५ प्रतिशत बोनस र २ दशमलव २५ प्रतिशत नगद लाभांश प्रस्ताव गरेपछि शेयरमूल्य समायोजन भई कम्पनीको मूल्य रू. ९८० मा आइपुगेको हो । त्यसपछि बजार घट्दै आएकाले कम्पनीको शेयरमूल्य असार १९ गते प्रतिकित्ता रू. ७९३ मा आइपुगेको छ । बिहीवार कम्पनीको शेयरमूल्यमा सकारात्मक सर्किट ब्रेक लागेको छ । कम्पनीले चालू आवको तेस्रो त्रैमासमा रू. २ करोड ६५ लाख १५ हजार नाफा कमाएको छ । कम्पनीको चुक्तापूँजी रू. १० करोड ७९ लाख १९ हजार पुगेको छ । कम्पनीले हकप्रद तथा बोनस शेयर जारी गरेपछि पूँजी बढेको हो । कम्पनीको प्रतिशेयर आम्दानी वार्षिक रू. ३२ दशमलव ७६ पैसा छ भने प्रतिशेयर नेटवर्थ रू. १६४ दशलमव ८२ पैसा छ ।

कम्पनीको ५५ दिनको कारोबार अवधिको अन्तिम दिनमा सेतो मुडुलो मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा बढ्ने संकेत देखाउँछ । आरएसआई न्युट्रन जोन ५७ दशमलव ६६ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन ४४ दशमलव ५५ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्यरेखाले १४ दिने र २६ दिने औसत मूल्यरेखालाई तलबाट काटेर माथि गएको छ । यसले कम्पनीको मूल्य यस दिन उच्च अंकले बढेको संकेत गर्छ । बिहीवारको शेयरमूल्य रू. ७ हजार ९३ देखि बजारको अवस्था परिवर्तन भई मूल्य महँगिएमा रू. ८३२ मा प्रतिरोध पाउने र सस्तिएमा रू. ६६७ मा टेवा पाउने देखिन्छ ।