पाँचथर पावर कम्पनी : कम्पनी विश्लेषण (शुक्रवार, २७ असार २०७६)

Jul 12, 2019

लगानी कम्पनी विश्लेषण

वैशाख १९ गते धितोपत्र दोस्रो बजारमा सूचीकृत भएको यस कम्पनीको हालसम्म ३५ दिन शेयर कारोबार भएको छ । कम्पनीको पहिलो कारोबारका लागि नेप्सेले शेयरमूल्य प्रतिकित्ता रू. ८६ दशमलव ६२ देखि २५९ दशमलव ८६ सम्म मूल्यरेन्ज तोकेको थियो । दोस्रो बजारमा प्रतिकित्ता शेयरमूल्य रू. २५५ बाट कारोबार शुरू भएको थियो । बिहीवार कम्पनीको शेयरमूल्य अघिल्लो दिनको तुलनमा स्थिर रही रू. १३६ कायम भएको छ । यस दिन न्यूनतम रू. १३५ देखि अधिकतम रू. १३७ सम्म कम्पनीको १ हजार १० कित्ता कारोबार भएको छ । कम्पनीको चुक्ता पूँजी रू. ९६ करोड २५ लाख छ । कम्पनीको ३४ दिनको कारोबार अवधिलाई लिएर गरिएको मैनबत्ती विश्लेषणमा अन्तिम दिनमा टुप्पी भएको कालो मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा बुलिशमा रिभर्स हुने संकेत गर्छ । विश्वसनीयता भने कम छ । आरएसआई न्युट्रल जोन २८ दशमलव २४ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन १ दशमलव ६२ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्य यी दुई रेखालाई माथिबाट काटेर तल गएको छ । बिहीवारको शेयरमूल्य रू. १३६ देखि बजारको अवस्था परिवर्तन भई मूल्य महँगिएमा रू. १३९ मा प्रतिरोध पाउने देखिन्छ ।