ग्लोबल आईएमई लघुवित्त : कम्पनी विश्लेषण (बिहीवार, ९ साउन २०७६)

ग्लोबल आईएमई लघुवित्त कम्पनीले २०७५ साउन २१ देखि २०७६ असार ३१ गतेसम्म कायम सदस्यलाई शत प्रतिशत हकप्रद जारी गर्दै छ । कम्पनीले ११ लाख ४ हजार ५७५ कित्ता हकप्रद शेयर विक्री गर्न लागेको हो । कम्पनीले आफ्नै स्रोत व्यवस्थापनका लागि हकप्रदमार्फत पूँजीवृद्धि गर्न लागेको हो । हाल रू. ११ करोड ४ लाख ५७ हजार रहेको कम्पनीको चुक्ता पूँजी हकप्रद वितरण गरेपछि रू. २२ करोड ९ लाख १५ हजार पुग्नेछ । यस कम्पनीमा सर्वसाधारणतर्फ ३० र संस्थापकतर्फ ७० प्रतिशत शेयर स्वामित्व छ । हालसम्म चौथो त्रैमासको वित्तीय विवरण सार्वजनिक नगरेको कम्पनीले गतवर्ष लगानीकर्तालाई अघिल्लो आर्थिक वर्षको मुनाफाबाट १५ प्रतिशत बोनस शेयर वितरण गरेको थियो । बुधवार कम्पनीको शेयरमूल्य अघिल्लो कारोबारभन्दा ५ अंक घटेर रू. ७१० कायम भएको छ ।

कम्पनीको ६२ दिनको कारोबार अवधिको अन्तिम दिनमा सानो पुच्छर भएको कालो मैनबत्ती आकृति बनेको छ । यसले कम्पनीको शेयरमूल्य आगामी दिनमा घट्ने संकेत देखाउँछ । ओभरसोल्ड जोन २१ दशमलव ०२ विन्दुमा छ । यसले शेयर विक्री चाप बढेको देखाउँछ । कम्पनीको स्ट्यान्डर्ड डेभिएशन ११ दशमलव ४४ विन्दुमा छ । उतारचढाव उच्च छ । यस्तो अवस्थामा जोखिम उच्च हुन्छ भने प्रतिफल पनि उच्च हुन सक्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिँदै गएका छन् । हालको मूल्य यी दुई रेखाभन्दा तल छ । बुधवारको शेयरमूल्य रू. ७१० देखि बजारको अवस्था परिवर्तन भई मूल्य महँगिएमा रू. १ हजार २०२ मा प्रतिरोध पाउने र मूल्य सस्तिएमा रू. ६९५ मा टेवा पाउने देखिन्छ । कम्पनीको शतप्रतिशत हकप्रद प्रयोजनका लागि साउन १ गते मूल्य समायोजन भएको थियो ।

प्रतिक्रिया [0]