युनाइटेड इन्स्योरेन्स कम्पनी : कम्पनी विश्लेषण (बिहीवार, ९ साउन २०७६)

पूँजीवृद्धिका लागि २४० प्रतिशत हकप्रद शेयर जारी गर्न लागेको कम्पनीले साउन १४ गते शेयरधनी दर्ता पुस्तिका बन्द गर्ने भएको छ । कम्पनीलाई धितोपत्र बोर्डले हकप्रद निष्कासनका लागि २०७६ असार ८ गते अनुमति दिएको छ । यससँगै कम्पनीले ७२ लाख ५७ हजार ६०० कित्ता हकप्रद शेयर जारी गने भएको छ । हाल कम्पनीको चुक्ता पूँजी रू. ३० करोड २४ लाख छ । २४० प्रतिशत हकप्रद शेयर निष्कासन तथा बाँडफाँट गरेपछि पूँजी रू. १ अर्ब २ करोड पुग्नेछ । कम्पनीको चौथो त्रैमासिक वित्तीय विवरण सार्वजनिक हुन बाँकी छ । कम्पनीले चैत मसान्तसम्म रू. ७ करोड ५५ लाख नाफा कमाएको थियो । सो अवधिमा कम्पनीले रू. ३५ करोड ५५ लाख बीमा शुल्क आर्जन गरेको छ । बुधवार कम्पनीको शेयरमूल्य अघिल्लो दिनको तुलनामा रू. २३ ले घटेर भई रू. ८७३ पुगेको छ । कम्पनीको १०० पटकको कारोबारमा ४ हजार २८६ कित्ता शेयर खरीदविक्री भएको छ । कम्पनीको अधिकतम मूल्य रू. ९०६ पुगेको छ भने न्यूनतम रू. ८७० पुगेको छ । 

कम्पनीको ६४ दिनको कारोबार अवधिलाई लिएर गरिएको मैनबत्ती विश्लेषणमा अन्तिम दिनमा कालो मारुबोजु आकृति बनेको छ । यस्तो आकृतिले कम्पनीको शेयरमूल्य आगामी दिनमा घट्ने संकेत देखाउँछ । आरएसआई न्युट्रल जोन ४७ दशमलव ७२ विन्दुमा छ । यसले शेयर खरीदविक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन १४ दशमलव ९७ विन्दुमा छ । उतारचढाव न्यून छ । यस्तो अवस्थामा कम जोखिम हुन्छ भने प्रतिफल पनि कम हुने गर्छ । त्यस्तै, कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग जोडिएका छन् । हालको मूल्य २६ दिने औसत रेखासँग जोडिएको छ भने १४ दिने मूल्यरेखाभन्दा तल छ । आइतवारकोे शेयरमूल्य रू. ८७३ देखि बजारको अवस्था परिवर्तन भई मूल्य महँगिएमा रू. ८९६ मा प्रतिरोध पाउने र मूल्य सस्तिएमा रू. ८५५ मा टेवा पाउने देखिन्छ ।

प्रतिक्रिया [0]