बजारमा दशैं रौनक : व्यापारी भन्छन् पोहोर जस्तो छैन

मिलन विश्वकर्मा

दशैं, तिहार जस्ता चाडपर्व नजिकिँदै गएपछि काठमाडौंका मुख्य व्यापारिक केन्द्र मानिने असन, महाबौद्ध, इन्द्रचोक, न्यूरोड लगायत ठाउँहरूमा किनमेल गर्ने मानिसको भीड बढ्दै गएको छ । अन्य सिजनमा पनि उच्च मात्रामा किनमेल हुुने ती ठाउँमा अहिले मानिस राम्रोसँग हिँड्ने ठाउँ समेत छैन । 

तर व्यावसायिक भवनहरूमा भने यस वर्ष दशैंको रौनक पहिलेको जस्तो छैन । अघिल्ला वर्षको यो समयमा सुन्धारास्थित काठमाडौं मल तथा सिभिल मल, ललितपुरको लबिम मल, नयाँ बसपार्कस्थित बीजी मल, चावहिलको केएल टावरमा लगायतका व्यावसायिक भवनमा ग्राहकको ठूलो भीड लाग्ने गरेको थियो । तर त्यसको तुलनामा अहिले ग्राहकको भीड न्यून देखिन्छ ।
असन, इन्द्रचोकमा पनि पहिलेको जस्तो ग्राहकको उपस्थिति र व्यापार नभएको व्यापारीहरू बताउँछन् । पहिले यो समयमा ग्राहकको अझै भीड हुने गरेको न्यूरोड, असन, काठमाडौं मलका व्यापारीको भनाइ छ । 

दी काठमाडौं मल व्यापार संघकी अध्यक्ष सुष्मा महराले अघिल्ला वर्षहरूको व्यापारको तुलनामा अहिले ठूलो ह्रास आएको बताइन् । उनले भनिन्, ‘अघिपछिका दिनमा २ हजार कमाउने व्यापारीले अहिले ५ हजारभन्दा बढी कमाएका छन् । असन, इन्द्रचोक, न्यूरोडका सडकपेटीमा व्यापार गर्ने व्यापापरीले ओत राखेर पसल चलाइरहेका छन् । 

असन, न्यूरोड, इन्द्रचोक, महाबौद्ध लगायत व्यापारीलाई ग्राहक बाहेक अरूसँग बोल्ने फुर्सद पनि छैन । ग्राहकको चाहना अनुसार कपडा देखाउन र अंकित मूल्यमा बार्गेनिङ गर्न नै व्यापारीहरू व्यस्त छन् । ग्राहक तान्न पसलहरूका एजेन्टहरू सडकमा उत्तिकै मात्रामा सक्रिय छन् । एजेन्टहरूले विभिन्न उपहार र स्कीम देखाउँदै ग्राहकलाई आप्mनो पसलमा किनमेल गर्न रिझाउने गरेको देख्न सकिन्छ । त्यहाँ ग्राहकलाई तानातान नै हुने गर्छ । यस्ता कारण दशैंको समयमा व्यापारीले अघिपछि भन्दा कयौं गुणा बढी व्यापार गर्छन् । 

अघिपछि अधिकतम ३० प्रतिशत मात्र छूट दिने व्यापारीले अहिले न्यूनतम २० देखि अधिकतम ५० प्रतिशतसम्म छूट पनि दिएका छन् । तर वस्तुको अंकित मूल्य पहिलेभन्दा बढी भएको पनि ग्राहकको टिप्पणी छ । ग्राहकका अनुसार तयारी पोशाकको मूल्यमा अघिपछिको मूल्यमा भन्दा धेरै अन्तर छ । 

व्यापारीका अनुसार तयारी पोशाकको बढी विक्री हुने गरेको छ । नेपाली समाजमा दशैंमा नयाँ लुगा लगाउनुपर्छ भन्ने मान्यता छ । त्यसैले यस्ता वस्तुको विक्री बढी भएको व्यापारीहरू बताउँछन् । यसका अलावा दशैंमा चाहिने आवश्यक सामग्री, उपहार, खाद्य वस्तुको उच्च मात्रामा विक्री भएको उनीहरूको भनाइ छ ।

मलहरूमा उपहार योजना 
चाडपर्वको समयमा काठमाडौंका विभिन्न व्यापारिक मलहरूले उपहार योजना ल्याएका छन् । गाेंगबुस्थित बीजी मलले ‘शप एन्ड विन’ उपहार योजना ल्याएको छ । उक्त योजना अन्तर्गत ग्राहकले हरेक दिन कुनै न कुनै उपहार पाउन सक्नेछन् । उपहार योजनामा सहभागी हुन ग्राहकले मलमा कम्तीमा १ हजार रुपैयाँको सामान किन्नुपर्नेछ । सामान किनिसकेपछि ग्राहकले पाउने कुपनका आधारमा दैनिक, साप्ताहिक तथा बम्पर उपहारको घोषणा गरिनेछ । बम्पर उपहारमा गोलाप्रथाबाट एक–एकजनाले यामाहाको एफजेड मोटरसाइकल, यमाहा रे जेड स्कूटर तथा ४ रात ५ दिनको बैंकक भ्रमण जित्न सक्नेछन् । 

दैनिक अफर अन्तर्गत ग्राहकले १ हजार रुपैयाँको शपिङ भौचर, लन्च कुपन तथा मुभी टिकट पाउनेछन । त्यसैगरी साप्ताहिक उपहारमा सीजीको ३२ इन्च एलईडी टीभी, वाशिङ मेशिन र ग्यास एन्ड इलेक्ट्रिक हिटर, सीजी इलेक्ट्रिक ओभन र साउन्ड बार छन् ।

चावहिलस्थित केलएल टावरले पनि दशैं, तिहार लक्षित उपहार योजना शुरू गरेको छ । उक्त योजना अन्तर्गत ग्राहकले दैनिक, साप्ताहिक तथा बम्पर उपहार पाउने सक्नेछन् । साथै हरेक दिन एक जोडीलाई एफ क्युब सिनेमाको टिकट, एक हजार रुपैयाँ बराबरको शपिङ भौचरका साथै आकर्षक उपहार पनि प्रदान गरिने बताइएको छ । साप्ताहिक रूपमा गोयन्का ब्रान्डको रेफ्रिजिरेटर, वाशिङ मेशिन, एलईडी टेलिभिजन, आइरन, हिटर, भ्याकुम क्लिनर लगायत घरायसी सामग्री उपलब्ध गराइनेछ । बम्पर उपहार अन्तर्गत एक जनालाई यामाहाको एफजेड एसएफआई भीथ्री मोटरसाइकल प्रदान गरिने योजना छ । काठमाडौंका अन्य व्यावसायिक मलमा पनि यस्ता किसिमका उपहार योजना देख्न सकिन्छ ।
 

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस