सेन्ट्रल फाइनान्स : कम्पनी विश्लेषण (मंगलवार, २० फागुन २०७६)

अभियान संवाददाता

चालू आवको दोस्रो त्रैमासमा कम्पनीको नाफा २० दशमलव ३३ प्रतिशतले वृद्धि भएको छ । सो अवधिमा कम्पनीले रू. ४ करोड ५१ लाख नाफा कमाएको हो । कम्पनीले गत आवको दोस्रो त्रैमासमा रू. ३ करोड ७५ लाख नाफा कमाएको थियो । चालू आवको दोस्रो त्रैमासमा कम्पनीको खुद ब्याज आम्दानी र सञ्चालन नाफामा वृद्धि भएकाले नाफा बढेको हो । चूक्तापूँजी रू. ८२ करोड ३३ लाख रहेको कम्पनीले जगेडा कोषमा रू. १६ करोड ७५ लाख छुट्याएको छ । त्यस्तै, शेयरधनीलाई ७ प्रतिशत नगद लाभांश वितरण गर्ने प्रस्ताव पारित गरेको छ । कम्पनीको फागुन १६ गते सम्पन्न वार्षिक साधारणसभाले सो लाभांश पारित गरेको हो । सोमवार कम्पनीको शेयरमूल्य रू. १४६ कायम रहेको छ ।

कम्पनीको ६५ दिनको कारोबार अवधिको अन्तिम दिन पुच्छर भएको कालो मैनबत्ती चित्र बनेको छ । यस्तो आकृतिले कम्पनीको शेयरमूल्य आगामी दिनमा घट्ने संकेत गर्दछ । आरएसआई न्यूट्रल जोन ४९ दशमलव १७ विन्दुमा छ । यसले शेयर खरीदविक्री चाप सन्तुलनमा रहेकोे देखाउँछ । कम्पनीको स्ट्यान्डर्ड डेभिएशन ३ दशमलव ४४ विन्दुमा छ । उतारचढाव न्यून रहेको छ । त्यस्तै कम्पनीको मुभिङ एभरेजमा २६ दिने औसत मूल्यरेखा र १४ दिने औसत मूल्यरेखा एकअर्कासँग टाढिएका छन् । हालको मूल्यरेखाले १४ दिने औसत मूल्यरेखालाई माथिबाट काटेर तल झरेको छ । सोमवारको शेयरमूल्य रू. १४६ देखि बजारको अवस्था परिवर्तन भई महँगिएमा रू. १५६ मा प्रतिरोध पाउने र सस्तिएमा रू. १४४ मा टेवा पाउने देखिन्छ ।

प्रतिक्रिया [0]