२ % ले कारोबार घट्दा ३६ मिनेट अघिनै नेप्से बन्द, १० करोडभन्दा बढीको कारोबार

२०७७ बैशाख, ३०

लगानी नेप्से विश्लेषण

वैशाख ३०, काठमाडौं । कारोबार बन्द भएको ५० दिनमा खुलेको नेपालको शेयर बजार मंगलवार २ दशमलव शून्य २ प्रतिशतले घटेपछि निर्धारित अवधिभन्दा ३६ मिनेट अघिनै बन्द भएको छ ।

लकडाउनका विच विशेष परिस्थितिमा २ घण्टाका लागि खोलिएको बजार मंगलवार २५ दशमलव ३० अंकले घटेर १ हजार २२६ दशमलव १५ विन्दुमा बन्द भएको हो ।

यस दिन १ घण्टा २४ मिनेट खुलेको बजारमा रू. १० करोड ४४ लाख ९९ हजार बराबरको कारोबार भएको छ । यस दिन २९२ कम्पनीको १ लाख ६ हजार ४१२ कित्ता शेयर कारोबार भएको हो ।

यस दिन कारोबारमा आएका ११ समूहकै परिसूचक घटेको छ । यस दिन नागरिक लगानीकोषको सबैभन्दा बढी रू. ८ करोड ८८ लाख ५७ हजार बराबरको शेयर कारोबार भएको छ । नेपाल पुनर्बीमा कम्पनीले उक्त रकम बराबरको नागरिक लगानीकोषको शेयर खरीद गरेको नेप्सेले जानकारी दिएको छ ।

एकै दिन २५ प्रतिशत नेटवर्थ गुमाएको भन्दै नेपाल इन्भेष्टर्स फोरमका अध्यक्ष छोटेलाल रौनियारले बजार खोल्नुको अर्थ नभएको बताए । अनलाईन कारोबार प्रणााली परिक्षण कालमै रहेको भन्दै यसलाई माध्यम बताएर बजार खोल्नाले लगानीकर्ताहरुले एकै दिन २५ प्रतिशत नेटवर्थ गुमाउनु परेको रौनियारको भनाइ छ ।

कारोबारमा २५ प्रतिशत मार्जिन अनिवार्य गरेकाले पनि समस्या भएको रौनियारको आरोप छ । उनले यसरीनै बजार घट्दै जाने हो भने आम लगानीकर्ताहरु मार्जिन कलको समस्यामा पर्ने हुदाँ समयमै समाधानको उपाय खोज्न बोर्डलाई आग्रह गरेका छन् ।

नेपाल धितोपत्र बोर्डका कार्यकारी निर्देशक निरज गिरीले एक दिनको कारोबारलाई हेरेर आत्ति हाल्नुपर्ने अवस्था नभएको बताए । बजार घट्यो भन्दैमा बन्द गर्न नहुने बताउंदै उनले पछिल्लो केहि दिनको कारोबारलाई हेरेर आवश्यक कदम चाल्नुपर्नेमा जोड दिएका छन् ।

उनले भने, ‘यो विषम परिस्थितिमा बजार खोल्नुको अर्थ हामीसँग भएको अनलाईन कारोबार प्रणालीमा बढीभन्दा बढी लगानीकर्ताहरुलाई जोड्र्ने मुख्य उदेश्य हो ।’
यद्यपि जानी–जानी बजार बढाउन र घटाउन लागेको अवस्था भए निर्ममतापूर्वक कारवाही गर्ने उनले प्रष्ट पारे ।

नेपाल स्टक एक्सचेञ्ज (नेप्से) का प्रमुख चन्द्र सिंह साउदले अहिलेको बजार यहि क्षेत्रमा निर्भर भएका लगानीकर्ताहरुले शेयर कारोबार गर्ने गरी खोलिएको जानकारी दिएका छन् ।
उनले सामान्य अवस्थामा नभई विशेष परिस्थितिमा खोलिएकाले अत्यावश्यक अवस्थाका लगानीकर्ताहरु मात्र कारोबारमा सहभागि भएको बताए ।

अनलाईन कारोबार प्रणालीमा कुनै समस्या नभएको बताउंदै साउदले धेरैजसो लगानीकर्ता अफलाईन कारोबारमै रमाएकाले समस्या भएको बताए । बजार घट्दा सबैभन्दा बढी क्षति लगानीकर्तालाई हुने हुँदा अनलाईन प्रणालीसँग जोडिन उनले अनुरोध गरेका छन् ।

गत चैत १० गतेदेखि बन्द रहेको शेयर कारोबार हालको अवस्थालाई ध्यान दिएर केहि नयाँ व्यवस्था लागू गर्दै खोलिएको हो ।

यस अघि दैनिक ५ घण्टा कारोबार हुँदै आएकोमा हाललाई दैनिक २ घण्टा (विहान ११ देखि १ बजे ) सम्म खुल्ला गरिएको हो । नेप्से परिसूचक २ प्रतिशतले घटे वा बढेमा सो दिनको कारोबार बन्द हुने नयाँ व्यवस्था अनुसार मंगलवार १२ बजेर २४ मिनेटमा कारोबार बन्द गरिएको हो ।

अघिल्लो कारोबार दिन चैत ९ गते रू. १६ खर्ब १९ करोडभन्दा बढी रहेको बजार पूँजीकरण मंगलवार रू. १५ खर्ब ६७ अर्बमा झरेको छ । लगानीकर्ताहरुले एकै दिन रू. ३२ अर्ब ३४ करोडभन्दा बढी रकम गुमाएका छन् ।