सामान्य अंक घट्यो नेप्से, ४ अर्ब ३० करोड बराबरको धितोपत्र कारोबार

एक दर्जन कम्पनीको शेयर मूल्य उच्च दरमा वृद्धि

अभियान संवाददाता

काठमाडौं । साताको अन्तिम कारोबार दिन बिहीवार नेप्से परिसूचक सामान्य अंक घटेको छ । यस दिन नेप्से परिसूचक शून्य दशमलव ६२ अंक घटेर २ हजार ८८ दशमलव ९९ विन्दुमा कायम भएको छ ।

लगातार तीन दिन बढेको बजारबाट कारोबारीले नाफा बुक गर्नु र सामान्य भए पनि पुस मसान्तको दबाबसमेत पर्न गएकाले बजारमा सामान्य दबाबमा परेको देखियो । नेप्से परिसूचक २१ सय विन्दु नजिक पुग्दा विक्रेता हाबी भएका छन् । यसोत बुधबार इन्ट्रा डे नेप्से २१ सय विन्दुमाथिसम्म पुगेको थियो । बिहीवार पनि परिसूचक २ हजार १ सय विन्दु पुग्दा विक्रेता हाबी भएका छन् । 

अधिक तरलताका कारण बैंकहरूले धमाधम ब्याजदर घटाउन थालेका छन् । कुमारी बैंक र एनआइसी एसिया बैंकले ब्याजदर घटाएको सूचना नै जारी गरिसकेको छ । माघ लागेपछि अरु बैंकहरूले पनि ब्याजदर घटाउन सक्ने कतिपयको अनुमान छ । 

यसकारण पनि शेयर बजारमा सकारात्मक प्रभाव पर्ने जानकार बताउँछन् । 

त्यस्तै बीमा प्राधिकरणले बीमा कम्पनीहरूमा लगानी नीति खुकुलो बनाएको छ । शेयर बजारमा पनि चुक्ता पूँजीको १५ प्रतिशतसम्म लगानी गर्न बाटो खोलिदिएको छ । यसकारण पनि अब शेयर बजारमा सकारात्मक प्रभाव पर्ने देखिन्छ । 

बिहीवार सेन्सेटिभ फ्लोट इन्डेक्स शून्य दशमलव ५६ प्रतिशत र सेन्सेटिभ फ्लोट इन्डेक्स शून्य दशमलव २१ प्रतिशत घटेको छ भने फ्लोट इन्डेक्स शून्य दशमलव ०२ प्रतिशत वृद्धि भएको छ । यस दिन ३०७ धितोपत्रको २ करोड २१ लाख ३२ हजार ७६८ कित्ता शेयर ७९ हजार ३८९ पटकमा रू. ४ अर्ब ३० करोड बराबरको शेयर कारोबार भएको छ । 

कारोबारमा आएका धितोत्रपमध्ये सात धितोपत्रको मूल्य सर्किट लेबलमा वृद्धि भएको छ । निर्धन उत्थान लघुवित्त वित्तीय संस्था, समाज लघुवित्त वित्तीय संस्था, मिड सोलु हाइड्रोपावर, त्रिशुली जलविद्युत कम्पनी, मुक्तिनाथ कृषि कम्पनी, नेपाल वेयर हाउजिङ्ग कम्पनी र हिमालयन रिइन्स्योरेन्स कम्पनीको शेयर मूल्य सर्किट लेबलमा वृद्धि भएको हो । 

बिहीवार सबैभन्दा धेरै ९% नेपाल एसबिआई बैंक ऋणपत्र २०८९ नामक ऋणपत्रको मूल्य घटेको छ । यस ऋणपत्रको मूल्य अघिल्लो कारोबार दिनको तुलनामा आज ९ दशमलव ६० प्रतिशत घटेर रू. ९०४ मा झरेको छ । त्यस्तै दोस्रोमा मन्दाकिनी हाइड्रोपावरको शेयर मूल्य ४ दशमलव ९० प्रतिशत घटेर रू. ४५० कायम भएको छ । 

सर्वाधिक शेयर खरीदविक्री हिमालयन बैंकको संस्थापक शेयरको भएको छ । यस कम्पनीको रू. २३ करोड ८५ लाख बराबरको संस्थापक शेयर कारोबार भएको छ । कम्पनीको शेयर मूल्य प्रतिकित्ता रू. १३४ दशमलव ९० कायम भएको हो । सर्वाधिक शेयर खरीदविक्री हुने दोस्रोमा रहेको नेपाल रिइन्स्योरेन्सको कम्पनीको संस्थापकको शेयरको रू. १९ करोड ६० लाख बराबरको कारोबार भएको छ । 

कारोबारमा आएका १३ समूहगत परिसूचकमध्ये चार समूहको परिसूचक बढेको छ भने बाँकी समूहको सूचक घटेको छ । सबैभन्दा बढी जलविद्युत समूहको परिसूचक १ दशलमव ५६ प्रतिशत वृद्धि भएको छ भने जीवन बीमा समूहको सूचक १ दशमलव ०४ प्रतिशत घटेको छ ।
 

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस