काठमाडौं । साताको अन्तिम कारोबार दिन बिहीवार नेप्से परिसूचक ८ दशमलव ७१ अंक घटेको छ । यस दिन परिसूचक २ हजार ४९ दशमलव २८ विन्दुमा कायम भएको हो ।
यस दिन नेप्से घटे पनि कारोबार रकम भने अघिल्लो कारोबार दिनको तुलनामा वृद्धि भएको छ । बुधवार रू. ४ अर्ब ४ करोड बराबरको कारोबार भएकोमा बिहीवार साढे ५ अर्ब बराबरको भएको हो ।
बिहीवार सेन्सेटिभ इन्डेक्स १ दशमलव ३३ प्रतिशत, फ्लोट इन्डेक्स शून्य दशमलव ३० प्रतिशत र सेन्सेटिभ फ्लोट इन्डेक्स शून्य दशमलव ६४ प्रतिशत घटेको छ ।
यस दिन ३०३ धितोपत्रको १ करोड ६० लाख ५२ हजार १०१ कित्ता शेयर १ लाख ८ हजार ४०३ पटकमा रू. ५ अर्ब ५८ करोड बराबरको कारोबार भएको छ ।
कारोबारमा आएका धितोपत्रमध्ये दुई धितोपत्रको मूल्यमा सकारात्मक सर्किट लागेको छ । कालिका पावर कम्पनी र सिगंटी हाइड्रोको शेयर मूल्य अघिल्लो कारोबार दिनको तुलनामा आज १० प्रतिशतका दरले वृद्धि भएसँगै सकारात्मक सर्किट लागेको हो ।कालिका पावरको शेयर मूल्य प्रतिकित्ता रू. ३७७ दशमलव ३० र सिगंटी हाइड्रोको शेयर मूल्य रू.३०५ दशमलव ८० पुगेको छ ।
बिहीवार सबैभन्दा बढी सिद्धार्थ प्रिमियर इन्स्योरेन्स कम्पनीका शेयरधनीले गुमाएका छन् । यस कम्पनीको शेयर मूल्य ६ दशलमव ५६ प्रतिशत घटेको छ । यससँगै कम्पनीको शेयर मूल्य प्रतिकित्ता रू. ७६९ मा झरेको छ ।
शेयर मूल्य सर्वाधिक घट्ने सूचीमा दोस्रोमा मन्दाकिनी हाइड्रोपावर छ । कम्पनीको शेयर मूल्य ५ दशमलव ८० घटेर रू. ४१९ दशमलव १० कायम भएको छ ।
यस दिन सर्वाधिक शेयर खरीदविक्रीको हिस्सा सोनापुर मिनरल्स एण्ड आयल लिमिटेडले ओगटेको छ । यस कम्पनीको रू. ३३ करोड ४५ लाख बराबरको शेयर कारोबार भएको हो । कम्पनीको शेयर मूल्य रू. ५०८ पुगेको छ । सर्वाधिक शेयर खरीदविक्री हुने दोस्रोमा शिवम् सिमेन्ट्स छ । कम्पनीको रू. १९ करोड ४८ लाख बराबरको शेयर खरीदविक्री भएको हो ।
यस दिन कारोबारमा आएका १३ समूहगत परिसूचकमध्ये चार समूहको परिसूचक बढेको छ भने बाँकीकाे घटेको छ । व्यापार समूहको परिसूचक सबैभन्दा बढी २ दशमलव ३४ प्रतिशत वृद्धि भएको छ भने अन्य समूहको परिसूचक ३ दशमलव ७० प्रतिशत घटेको छ ।