काठमाडौं । बैंकहरूले ब्याजदर घटाउँदा र लगानीकर्तालाई पुस मसान्तको दबाब सकिँदा शेयर बजारमा सकारात्मक प्रभाव परेको छ । आइतवार (आज) नेप्से परिसूचक २१ सय विन्दुमाथि पुगेको छ ।
बजार बढ्दा लगानीकर्ताको आकर्षण हाइड्रोपावर कम्पनीको शेयरमा परेको छ । अधिकांश हाइड्रोपावर कम्पनीका शेयर मूल्य उच्च दरले वृद्धि भएका छन् । माघ महीनादेखि लागू हुने गरी वाणिज्य बैंक, विकास बैंक र फाइनान्स कम्पनीहरूले ब्याजदर घटाएका छन् ।
सामान्यतया ब्याजदर घटेपछि शेयर बजारमा सकारात्मक प्रभाव पर्ने गर्छ । यसो त ब्याजदर घटेपछि शेयर कर्जा लिनेले सस्तो ब्याजदरमा ऋण पाउँछन्, जसको सकारात्मक प्रभाव शेयर बजारमा पर्ने देखिन्छ ।
यद्यपि शेयर बजार घटबढ भइरहन्छ । लगानीकर्ताले लगानी गर्नूपूर्व बजारको ट्रेण्ड, कम्पनीको समग्र अवस्थालाई अध्धयन गरेर लगानी गर्नुपर्ने जानकार बताउँछन् ।
आइतवार नेप्से परिसूचक १ दशलमव ५१ प्रतिशत बढेर २ हजार १२० दशमलव ६२ विन्दुमा पुगेको छ । यस दिन सेन्सेटिभ इन्डेक्स १ दशलमव ०४ प्रतिशत, फ्लोट इन्डेक्स १ दशलमव ४६ प्रतिशत र सेन्सेटिभ फ्लोट इन्डेक्स १ दशलमव ०६ प्रतिशत वृद्धि भएको छ ।
आइतवार ३१४ धितोपत्रको १ करोड ६६ लाख ५ हजार २३४ कित्ता शेयर ९४ हजार ५२६ पटकमा रू. ५ अर्ब ४५ करोड बराबरको शेयर कारोबार भएको छ । कारोबारमा आएका धितोपत्रमध्ये ५ हाइड्रोपावरको शेयर मूल्य १० प्रतिशतका दरले वृद्धि भएको छ ।
हिमालयन पावर पार्टनर, कालिका लघुवित्त, तेह्रथुम पावर, मध्यभोटेकोशी जलविद्युत कम्पनी र माथिल्लो मैलुङ खोला जलविद्युत कम्पनीको शेयर मूल्य १० प्रतिशतका दरले वृद्धि भएको हो ।
आइतवार सबैभन्दा बढी मेगा म्युचुअल फण्ड १ का इकाईधनीले गुमाएका छन् । यस फण्डको इकाई मूल्य ९ दशमलव ५३ प्रतिशत घटेको छ । फण्डको इकाई मूल्य रू. ७ दशलमव ५० कायम भएको छ ।
शेयर मूल्य सर्वाधिक घट्ने सूचीमा दोस्रोमा निर्धन उत्थान लघुवित्त छ । कम्पनीको शेयर मूल्य ४ दशमलव ३१ प्रतिशत घटेर रू. ६७९ मा झरेको छ ।
सर्वाधिक शेयर खरीदविक्री नेपाल पुनर्बीमा कम्पनीको संस्थापक शेयरको भएको छ । यस कम्पनीको रू. ३५ करोड ६८ लाख बराबरको संस्थापक शेयरको कारोबार भएको छ । सर्वाधिक शेयर कारोबार हुने दोस्रोमा रहेको सोनापुर मिनरल्स एण्ड आयल लिमिटेडको रू. २४ करोड ३ लाख बराबरको भएको छ ।
कारोबारमा आएका १३ समूहगत परिसूचकमध्ये दुईओटाको परिसूचक घटेको छ भने बाँकीको बढेको छ । व्यापार समूहको परिसूचक शून्य दशलमव ९४ प्रतिशत घटेको छ । हाइड्रोपावर समूहको परिसूचक भने सबैभन्दा बढी ४ दशलमव ५८ प्रतिशत वृद्धि भएको छ । यस समूहको अधिकांश कम्पनीको शेयर मूल्य उच्च दरले बढेसँगै समूहगत परिसूचक बढेको हो ।