यसरी गर्न सकिन्छ घर सजाउन गमलामा लगाइने फूलको हेरचाह

प्रशान्त खड्का

काठमाडौं । आफ्नो घरलाई चिटिक्क र आकर्षक देखाउन मानिसहरूले घर वरिपरि वा घरभित्रै पनि थरीथरीका फूल रोप्ने गर्छन । सजावटका लागि यसरी फूलहरू लगाउँदा घरलाई आकर्षक देखाउने मात्र नभई त्यसले हाम्रो स्वास्थ्यमा समेत सकारात्मक प्रभाव पार्न सक्छ । किनभने, घरमा फूल वा इन्डोर प्लान्टहरू रोप्दा त्यसले कोठाभित्रको वातावरण तथा हावालाई सफा राख्न मद्दत गर्ने सरोकारवालाहरू बताउँछन् ।

घरभित्र वा घर वरिपरि लगाइने फूल तथा बिरुवाका धेरै प्रजातिहरू छन् । तिनलाई हामीले नजिकैको नर्सरीमा गएर आफ्नो रोजाइअनुसार किनेर लगाउन सकिन्छ । यसमा मुख्यगरी मनिपलान्ट, रबरपलान्ट, सगुन, पाम, डाइफन, मस्टेरिया, ड्रेसिनिया, स्पाइडर पलान्ट, अम्ब्रेला पलान्ट, बटरफ्लाइ, सिंगोलियम, सुपुलेन्ट, लक्की बम्बोलगायत फूल तथा बिरुवा पर्दछन् । यिनीहरूले घरको शोभा बढाउनुका साथै त्यस वरपरको वातावरणलाई समेत स्वच्छ राख्ने काम गर्दछ ।

नेपाल पुष्प व्यवसायी कट्फलाबर एसोसिएसनका संयोजक सुशील खड्काका अनुसार तुलनात्मक रूपमा फार्ममा व्यावसायिक प्रयोजनका लागि रोपिने फूलहरूको भन्दा घर सजावटका लागि लगाइने फूलको स्याहारसुसार बढी नै गर्नुपर्छ । फार्ममा रोपिने फूलले प्राकृतिक रूपमै हावा, पानी र शूर्यको किरण पाउँछ भने घरभित्र वा कोठामा रोपिने फूलले प्राकृतिक रूपमा बाहिरको हावापानी नपाउने हुनाले चाँडो मर्ने वा सुकेर जाने हुन सक्छ ।

गमलामा रोप्नुभन्दा पहिले नै हामीले ती फूल वा बिरुवाबारे कम उज्यालोमा हुर्किन सक्ने हुन् वा बढी उज्यालो आवश्यक पर्ने खालका हुन् भनेर थाहा पाउनु  जरुरी रहेको उनी बताउँछन् । काठाभित्र रापिने यस्ता प्रजातिका बिरुवालाई लामो समयसम्म जोगाएर राख्न रोप्नुभन्दा पहिले नै तिनको विशेषताबारे थाहा पाउन सकिए हाम्रो लगानी खेर नजाने उनको भनाइ छ । कतिपय फूलका प्रजातिलाई रोग लाग्नबाट बचाउन कोठाभित्र प्रशस्त मात्रामा घामको किरण पर्ने स्थानतिर गमलालाई राख्नुपर्ने उनी बताउँछन् ।

गमलामा रोपिने फूलमा विशेषगरी पात डढ्ने डढुवा रोग, जरा गल्ने र किरा लाग्ने समस्या धेरै आउन सक्छन् । मान्छेहरूले पानीको सिँचाइ धेरै गर्ने, घामको मात्रा पुर्‍याउन नसक्ने र माटोको गुस्तर राम्रो नहुनाले जरा गल्ने समस्या आउने गर्छ । त्यसबाट फूललाई जोगाउन घाम एवं सिँचाइको मात्रा मिलाउने र राम्रो माटोको प्रयोगमा ध्यान दिनुपर्ने उनको सुझाव छ । खड्काका अनुसार यदि किरा लागेको खण्डमा भने हाम्रै वरपर पाइने तितेपातेको रस, स्याम्फु, गाईको मलमूत्रको झोल बनाएर छर्कन सकिने उनको भनाइ छ । यसले किरा नियन्त्रणमा निकै मद्दत पुर्‍याउने गर्दछ ।

प्रतिक्रिया [0]