महिला लघुवित्त वित्तीय संस्था : कम्पनी विश्लेषण (आइतवार, २७ असार २०७८)

केही समयअघि मात्र आईपीओ निष्कासन गरेको महिला लघुवित्त वित्तीय संस्थाको शेयर मूल्य बिहीबार प्रतिकित्ता रु. ४ हजार ८०० कायम भएको छ । यस दिन कम्पनीको शेयर २ हजार ४२९ कित्ता कित्ता शेयर खरिद विक्री भएको हो ।

कम्पनीको शेयर दोस्रो बजारमा कारोबारमा आएको दुई महिना भएको छ । दुई महिने कारोबार अवधिमा कम्पनीको शेयर मूल्य उच्च रु. ५ हजार ३९० सम्म पुगेको थियो । कम्पनीको आईपीओ परेका लगानीकर्ताले छोटो समयमै आकर्षक प्रतिफल पाएका थिए ।  कम्पनीको शेयर मूल्य प्रतिकित्ता ८४१ म खुला भएर सर्किट लेबलमा वृद्धि ५ हजारभन्दा माथि पुगेको थियोे ।

कम्पनीले चालू आवको तेस्रो त्रैमासमा रु. ६ करोड ४२ लाख नाफा कमाएको छ । गत आवको तुलनामा चालू आवमा कम्पनीको नाफा ११२ प्रतिशतले वृद्धि भएको हो । गत आवको तेस्रो त्रैमासमा कम्पनीले रु. ३ करोड २ लाख नाफा कमाएको थियो ।

चालू आवको तेस्रो त्रैमासमा खुद ब्याज आम्दानी, सञ्चालन नाफा र रु. २ करोड १७ लाख  खराब कर्जा उठाउन कम्पनी व्यवस्थापन सफल भएकाले पनि नाफा बढ्न टेवा पुगेको हो । आईपीओ निष्कासनपछि कम्पनीको चुक्ता पुँजी रु. १० करोड पुगेको छ ।

निष्कर्ष
कम्पनीको ६२ दिनको कारोबार अवधिको अन्तिम दिनमा सेतो मारुबोजू बनेको छ । यस्तो आकृतिले बजारमा कम्पनीको शेयर मूल्य बढ्ने संकेत गर्छ । आरएसआई न्युट्रल जोन ५६ दशमलव ८४ बिन्दुमा छ ।

यसले शेयर खरिद विक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएसन ५५ दशमलव ७१ बिन्दुमा छ । उतारचढाव सामान्य रहेको देखाउँछ । यस्तो अवस्थामा जोखिम मध्यम हुन्छ भने प्रतिफल पनि मध्यम हुने गर्दछ ।

त्यस्तै, कम्पनीको मुभिङ एभरेज २६ दिने औसत मूल्यरेखा र १४ दिने औसत मूल्यरेखा एकअर्कामा टाढिएका छन् । हालको मूल्यरेखा यी दुवै मूल्यरेखाको बीचमा छ ।
बिहीबारको शेयर मूल्य रु. ४ हजार ८०० देखि बजारको अवस्था परिवर्तन भई मूल्य सस्तिए रु. ४ हजार ३२० मा टेवा पाउने र महँगिए रु. ५ हजार ४ मा प्रतिरोध पाउने देखिन्छ ।

प्रतिक्रिया [0]