सबै स्टार्टअपहरू सफल हुँदैनन्

शेखर गोल्छा
अध्यक्ष, नेपाल उद्योग वाणिज्य महासंघ

भनिन्छ नि, कठिन समयले एकदमै मजबूत नेता/नेतृत्वहरू जन्माउँछ । त्यस्ता नेताले सहज समय लिएर आउँछन् र त्यो सजिलो समयले कमजोर नेतृत्व जन्माउँछ । त्यो कमजोर नेतृत्वले फेरि संघर्ष गर्नुपर्छ र पुनः राम्रो समय आउँछ । मैले यो किन भनेको हो भने अहिले नेपालमा चुनौतीपूर्ण समय चलिरहेको छ । यो हामी सबैलाई थाहा छ । भावी नेतृत्वले यो देशको उद्यमशीलतालाई धेरै अघि लैजानेछन्, मैले त्यो देखिरहेको छु । उद्योग वाणिज्य महासंघले स्टार्टअपलाई एकदमै महत्त्वका साथ अघि बढाइरहेको छ । महासंघ एउटा भिजन लिएर अघि बढिरहेको छ । त्यो भिजनअन्तर्गत २०३० सम्ममा नेपालको अर्थतन्त्रलाई १०० विलियन पुर्‍याउने, २२ लाख युवालाई देशमै रोजगारी दिने, व्यापार घाटालाई ५० प्रतिशतभन्दा कम गर्ने कुरा छन् । त्यो कसरी गर्न सक्छौं भन्ने गुरुयोजनाका साथ हामी अघि बढिरहेका छौं । हामीले विभिन्न चुनौतीलाई पहिचान समेत गरेका छौं । ती चुनौतीलाई समाधान गर्न सकियो भने यो गुरुयोजना कार्यान्वयनमा लैजान सक्छौं र लक्ष्य प्राप्त गर्न सफल हुनेछौं । यो गुरुयोजनाको मुख्य भाग स्टार्टअप रहेको छ । किनकि, जबसम्म उद्यमशीलता विकास हुँदैन, हामी यही व्यापार घाटाजस्ता विद्यमान समस्याबाट गुज्रिरहनुपर्नेछ । देशमा उत्पादन, सेवा क्षेत्रको विकास, विस्तार गर्न जरुरी रहेकाले नवउद्यमी ल्याउनैपर्छ ।  सबै स्टार्टअप सफल हुँदैनन् । यो यसलाई हामीले सहज रूपमा स्वीकार्न जरुरी छ । स्टार्टअप जुन, जसले शुरू गर्दै हुनुहुन्छ, जो नीति निर्माता, बैंकर्सहरू छन् सबैले यो विर्सन हुँदैन । सबै सफल हुन्छन् भन्ने हुँदैन । हामीले भिजन पेपरमा पहिचान गरेका चुनौतीमा नीतिगत सुधार भन्ने पनि छ । स्टार्टअपलाई कम्पनी दर्तादेखि अन्य कतिपय झन्झटिलो कानूनी व्यवस्था छ, त्यो हटाउनुपर्छ भन्नेबारे हाम्रो भिजन पेपरले बताएको छ । अर्को कुरा, हामीले चाहेको स्टार्टअपलाई विनाधितो कर्जा प्रवाह हुन सकोस् र यस्तो कर्जालाई सुरक्षण गर्न कुनै न कुनै तरिकाले बीमा गर्न सकौं भन्ने हो । त्यो गर्न सकियो भने स्टार्टअप र उद्यमशीलताको विकास, विस्तार पक्कै हुन सक्नेछ । अर्को कुरा, स्टार्टअपले कम ब्याजदरमा आफ्ना ‘प्रोजेक्टलाई फण्ड’ गर्न सकून् । यो पनि महासंघको प्राथमिकतामा छ ।  यसमा हामीले लबिइङसमेत गरिरहेका छौं । यसमा केही नीतिगत सुधारको काम भएको त छ, तर त्यो पर्याप्त छैन । ब्याजदर, फाइनान्सियल चार्ज बढी हुँदा अहिले उद्यमीहरू मर्कामा परिरहेका छन् । साना मझौलासँगै स्टार्टअप गर्ने उद्यमीलाई सहुलियतपूर्ण दरमा फाइनान्सिङ सुविधा हुनैपर्छ ।

प्रतिक्रिया [0]