'स्ट्याण्डर्ड चार्टर्ड न्यूबिज बिजनेश वुमन समिट एण्ड अवार्ड्स' बिजेता उद्यमीका धारणा

अभियान संवाददाता

अबको कार्यक्रममा सहयोग गर्नेछु

उषा गिरी 
अध्यक्ष, रिकिशी कम्पोष्ट प्रालि
वुमन आन्त्रप्रेनर अफ द इयर

यो अवार्ड पाउँदा खुशी लागेको छ । काम त पहिलेदेखि नै गर्दै आएको हुँ । तर, यसरी हौसला दिने कार्यक्रम भएको थिएन ।

अहिले काम गरेपछि अवार्ड पाइँदो रहेछ भन्ने पनि प्रमाणित भयो । यो अवार्ड पाएपछि मलाई व्यवसाय विस्तार गर्न पनि प्रोत्साहन मिलेको छ ।

अहिले जसरी सातै प्रदेशका उत्कृष्ट महिला उद्यमीहरूले अवार्ड पाउनु भयो, त्यसरी मेरो कम्पनीमार्फत पनि दिन पाए हुन्थ्यो भन्ने लागेको छ । यो कार्यक्रम मलाई एकदमै राम्रो लाग्यो । आगामी दिनमा यस कार्यक्रममा मेरो तर्फबाट पनि आवश्यक सहयोग हुनेछ ।

 

वातावरण दिए महिलाहरू सक्षम

 

डा. प्रतिभा पाण्डे
संस्थापक, हेर्वेदा बोटानिकल्स
इमर्जिङ वुमन आन्त्रप्रेनर अफ द इयर

यो अवार्डबाट निकै उत्साहित भएकी छु । विदेशमा पाएको अवार्डले भन्दा आफ्नै भूमिमा पाएको अवार्डले अर्कै ऊर्जा दिने रहेछ । स्वदेशमा आफ्नो कामको पहिचान र मूल्यांकन गरी राम्रो छ भनेर प्रोत्साहन र अवार्ड दिँदा थप जिम्मेवारी र ऊर्जा मिलेको छ ।

महिलाहरूको मुख्य चुनौती भनेको फाइनान्स हो । तर, योभन्दा पनि महिलाहरूलाई औद्योगिक क्षेत्रमा काम गर्ने वातावरण बनाइदिनुपर्छ । घरदेखि लिएर काम गर्ने ठाउँसम्म राम्रो वातावरण दिए महिलाहरू आफै सक्षम हुन्छन् । यस्ता कार्यक्रमले महिलाहरूको आत्मबल बढ्छ ।

महिला आफैलाई मेरो कामको मूल्यांकन हुँदो रहेछ भनेर आत्मविश्वास बढ्छ भने अर्काेतर्फ अरूले हेर्दा पनि अवार्ड पाएको महिला भनेर विश्वास गर्छन् ।

 

उद्यमी मात्र भनेर चिनिन चाहन्छु

 

ज्योति शेरचन
अध्यक्ष, सद्भावना हाउजिङ डेभलप प्रालि
विजेता, प्रोफेशनल वुमन अफ द इयर

महिला उद्यमी भनेर पुरस्कृत गर्नुभन्दा पनि एउटा व्यवसायीको रूपमा मात्र हेरेर पुरस्कृत गर्नु राम्रो कुरा हो । महिला र पुरुष सबै बराबर भएकाले म आफूलाई केवल उद्यमी मात्र भनेर चिनाउन चाहन्छु । तर जे भए पनि आफ्नो कामको मूल्यांकन भएर पुरस्कृत हुँदा खुशी त लागि नै हाल्छ ।

यो अवसरका लागि आयोजक टिमलाई धन्यवाद दिन चाहन्छु । सरकारले मलाई पूर्ण छात्रवृत्तिमा बेलायत पढ्न पठाएको थियो । अहिले सम्मानित हुँदा सरकारले मलाई त्यसबेला दिएको अवसरको परिणाम आज भोलि देखिँदै गरेको महसुस भएको छ ।

विगत ४५ वर्षदेखि अनवरत रूपमा आफ्नो पेशामा लागि परेको फल प्राप्त भएको महसुस भएको छ । काम गरेपछि पैसा त कमाइ हालिन्छ । त्यो खास ठूलो कुरा होइन । आफूले गर्दै आएको कामको मूल्यांकन अरूले गरेका छन् कि छैनन् भन्ने कुराले ठूलो अर्थ राख्दो रहेछ । पुरस्कृत हुन पाउँदा अझ बढी मेहनत गर्नुपर्छ । सबैका अगाडि अझ धेरै उदाहरणीय काम गर्नुपर्छ भन्ने ऊर्जा मिलेको छ ।

थप प्रेरणा मिलेको छ 

इन्दिरा याकथुम्बा
प्रिन्सिपल, ज्ञानोदय विद्यालय
इन्स्पिरेशनल वुमन आन्त्रप्रेनर अफ द इयर 

यो अवार्ड पाउँदा मलाई एकदमै खुशी लागेको छ । लामो समयदेखि म  अध्यापन क्षेत्रमै सक्रिय छु ।

अहिले आएर त्यसको उचित सम्मान भएको महसुस गरेकी छु । यसले मलाई यही पेशामा सक्रिय रूपमा अगाडि बढ्न प्रेरणा मिलेको छ ।

 

 

 

 

 

 

अवार्डले मनोबल बढाएको छ 

 

सुनैना ठाकुर
संस्थापक, सुनैना मिथिला आर्ट 
इन्डिजिनियस वुमन आन्त्रप्रेनर अफ द इयर

यो अवार्ड पाउँदा एकदम खुशी छु । किनभने, कोरोनाकाल तथा कोरोना नियन्त्रण गर्न लगाइएको लकडाउनका कारण व्यवसाय गर्ने मनोबल घटिसकेको थियो । तर, यो अवार्डले व्यवसाय गर्न मनोबल बढाएको छ ।

यसले मलाई आफ्नो व्यवसायलाई तीव्र गतिमा अगाडि बढाउन हौसला पनि मिलेको छ । अब मेरो व्यवसायलाई अझ राम्रोसँग विकास गर्छु ।

 

 

 

 

 

 

यस्ता कार्यक्रमहरूले महिला उद्यमीहरूलाई प्रेरित गर्छ

 

प्रकृति मैनाली
संस्थापक, शक्ति मिलन नेपाल 
सोसल वुमन आन्त्रप्रेनर अफ द इयर

कार्यक्रम वास्तवमै राम्रो थियो । तर, मैले महसुस गरेको यसको सबैभन्दा राम्रो पक्ष चाहिँ विविध जनजाति समूहको प्रतिनिधित्व हो । केही वर्षअघिसम्म यस्ता खालका कार्यक्रममा काठमाडौंबाट प्रतिनिधित्व भएको मैले पाएको थिएँ ।

यस्तो खालको कार्यक्रममा निश्चित जनजाति समूहका प्रतिनिधिहरुले आफ्नो सांस्कृतिक वेशभूषामा सहभागी हुनुपर्छ भन्ने म सोच्थेँ । आज यस हलमा मैले यो कुरा पाएको छु । उनीहरूसँग यो मञ्चमा सँगै उभिन पाउँदा म निकै गौरवान्वित भएको छु ।

हामीहरूले समावेशिताको कुरा गर्दै आइरहेका छौं । यो कार्यक्रमले समावेशी हुने प्रयास गरेको मैले महसुस गरेको छु । यस्ता कार्यक्रमहरूले महिला उद्यमीहरूलाई प्रेरित गर्छ । मलाई लाग्छ यस्ता कार्यक्रमहरू अन्य प्रदेशमा पनि आयोजना गरिनुपर्छ । यो कार्यक्रम आफैमा निकै राम्रो रह्यो ।

 

 

विदेश जाँदै गरेका श्रीमान्लाई रोकेर व्यवसाय शुरू गरेकी हुँ

सीता राई
प्रदेश १
सञ्चालक, लुमा घरेलु अल्लो कपडा उद्योग तथा तालीम केन्द्र मोरङ
विजेता, इन्टरप्राइजिङ वुमन अफ द इयर

गर्भवती भएको समयमा उद्योग दर्ता गरेर काम शुरू गरेकी थिएँ । त्यही बेला श्रीमान्ले बिदेश जाने सोच बनाउनु भयो । तर मैले श्रीमान्लाई विदेश जानबाट रोकेँ र आफैले व्यवसाय शुरू गरेँ । हामी नेपालीले सबै श्रम र समय विदेशी मुलुकमा खर्च गरेका छौं ।

त्यसैले आफ्नै देशमा श्रम गर्दै देश धनी बनाऊँ भनेर सबैलाई आग्रह गर्दछु । जिरो स्तरबाट काम गरेकी थिएँ । आज यी दिनहरू देख्न पाउँदा निकै हर्ष लाग्छ । अवार्ड पाउने दिदी बहिनीले पनि अब अझ बढी जाँगर चलाउन जरुरी छ । ९ वर्ष अघि १० लाख रुपैयाँ ऋण लिएर उद्योग स्थापना गरेकी थिएँ ।

आज १६ जनालाई काम दिएकी छु । सबैभन्दा ठूलो कुरा त घर परिवारको साथ नै हो । 

 

 

 

 

 

संघर्षको मूल्यांकन भएको महसुस गरेँ

वसुमाया तामाङ
बागमती प्रदेश काठमाडौं
सञ्चालक, नेपाली मन उद्योग
विजेता, इन्टर प्राइजिङ वुमन अफ द इयर

म धेरै दुःख गरेर यहाँसम्म आइपुगेँ । कुनै दिन म अरूको कम्पनीमा जागिर खान भनेर जाँदा मैले जागिर नपाएर धेरै भौतारिनु परेको थियो । तर पछि टिमुरको छोप बनाउन थालेपछि आज यही कुरा ब्राण्ड बन्ला भनेर सोचेकी थिइन् । मेरो यही दुःख र संघर्षको मूल्यांकन भएको महसुस गरेकी छु ।

अब म पनि सफल भएकी हुँ कि भन्ने सोच्न थालेकी छु । टिमुरको छोपलाई ब्राण्ड बनाउन शुरू मैले नै गरेकी हुँ । अहिले विस्तारै माछा, मासु र अन्य तरकारीको अचार पनि बनाउने गरेकी छु । मैले उत्पादन गरेका वस्तुहरू ३० प्रतिशत काठमाडौंमा र बाँकी ७० प्रतिशत अमेरिका, हङकङ, कोरिया र जापान निर्यात हुने गरेको छ ।

 

 

 

 

कृषक पनि सम्मानित हुन सक्छन् भन्ने उदाहरण बनेकी छु

समीक्षा शर्मा
गण्डकी प्रदेश, पर्वत
सञ्चालक, पर्वत कृषि उद्यान केन्द्र कुश्मा
विजेता, इन्टरप्राइजिङ वुमन अफ द इयर

माटोसँग खेल्न मन पर्ने भएकाले यो काम शुरू गरेकी थिएँ । कृषिको काम गर्ने मान्छेलाई समाजमा अरू मान्छेले पनि होच्याएको महसुस हुन्थ्यो । तर अहिले एउटा कृषक पनि सम्मानित हुन सक्छ भन्ने उदाहरण बनेकी छु । त्यसैले म एकदमै धेरै खुशी छु ।

आयोजकले दिएको यो अवसरप्रति निकै धेरै आभारी छु । महिलाले पनि धेरै राम्रो काम गर्न सक्छन् भनेर सबैका अगाडि महिलालाई चिनाउने गरी हामी महिला उद्यमीलाई सम्मानित गर्ने काम निकै प्रशंसनीय छ ।

न्यू बिजनेश एज तथा आर्थिक अभियानबाट अरूले पनि सिकेर महिला उद्यमीलाई प्रोत्साहन गर्ने काम गर्नुपर्दछ भन्ने लागेको छ ।

 

 

 

महिला उद्यमीहरूको सम्पर्क बढाउँछ

 

 

निरु चौधरी
लुम्बिनी प्रदेश 
सञ्चालक, पञ्चशील हस्तकला केन्द्र
विजेता, इन्टरप्राइजिङ वुमन अफ द इयर

यो अवार्ड पाउँदा म निकै खुशी छु । यस्ता अवार्ड कार्यक्रमले महिला उद्यमशीलता विकासमा ठूलो भूमिका निर्वाह गरेको मैले महसुस गरेको छु । हामीले धेरै महिला उद्यमीलाई चिन्न सक्यौं । उनीहरूबाट पनि हामी धेरै कुरा सिक्न सक्छौं ।

हाम्रो सञ्जाल पनि बढ्न सक्छ । बजारीकरण र उद्यमशीलताबारे थप कुरा बुभ्mन हामीलाई मद्दत गर्न सरकारले पनि यस्तो खालको कार्यक्रम र तालीमको आयोजना गर्नुपर्छ ।

म यस्तो खालको कार्यक्रममा कहिले पनि नगएको महिलाले तालीम र कार्यक्रममार्फत सिक्न, पहुँच बढाउन र व्यवसाय वृद्धि गर्न सक्छौं ।

समग्रमा कार्यक्रम निकै प्रेरणादायी थियो । यस्ता थप कार्यक्रम हुन्छ भन्ने मैले आशा गरेको छु ।

 

 

 

महिला उद्यमीका लागि प्रेरणादायी

कृष्णाकुमारी वंशी 
कर्णाली प्रदेश
सदस्य, लगनशील कोसेली टेक्सटाइल उद्योग
विजेता, इन्टरप्राइजिङ वुमन अफ द इयर

न्यू बिजनेश एजले सातै प्रदेशका महिलालाई यो अवार्ड प्रदान गरेकोमा म निकै खुशी छु । यस्ता अवार्डले दुर्गम भेगका महिलालाई उद्यमशील बन्न र समाजका अन्य महिलाका लागि रोजगारी सृजना गर्न प्रेरित गर्न सक्छ ।

यो अवार्ड पाएपछि मैले त्यति लामो समयदेखि गरिरहेको कामको अहिले मूल्यांकन भएछ भन्ने महसुस भएको छ । यो अवार्डले मलाई प्रेरित गरेको छ । साथै शीप विकासमार्फत थप महिलालाई स्वरोजगार बनाउन प्रतिबद्ध छु । यस्ता कार्यक्रमले महिला उद्यमीलाई राम्रोसँग काम गर्न प्रेरित गर्छन् ।

त्यसैले निरन्तरता पाउनुपर्छ । सरकारले महिलाका लागि धितोरहित कर्जामा तोकेको सीमा हटाउने हो भने यसले महिलालाई थप प्रेरणा दिन सक्छ । 

 

 

 

देशकै लागि काम गर्न उत्साहित छु

 

धनदेवी चोखाल
सुदूरपश्चिम प्रदेश
सञ्चालक, केशवमाधव कृषि फार्म प्रा.लि.
विजेता, इन्टरप्राइजिङ वुमन अफ द इयर 

समग्रमा कार्यक्रम निकै राम्रो रह्यो । यो अवार्डले म र मेरो परिवारलाई मात्रै नभएर देशभरका मानिसलाई प्रेरित गरेको छ ।

यो अवार्ड पाएपछि मैले सुदूरपश्चिमका महिलाका लागि काम गर्नुपर्छ र उपयुक्त वातावरण सृजना गर्नुपर्छ भन्ने जिम्मेवारी महसुस गरेको छु ।

सरकारले कैयौं नीति र योजनाहरू ल्याइरहेको भए पनि कार्यान्वयनको पाटो फितलो छ । यो भाषणमा मात्रै सीमित छ ।

महिला होटल उद्यमी भएर अहिलेसम्म मैले बैंक र वित्तीय संस्थाहरूबाट कुनै पनि मद्दत पाइनँ । कार्यक्रमका वक्ताहरूको कुरा सुनेपछि हाम्रा लागि उपयुक्त वातावरण बन्छ भन्नेमा म आशावादी छु ।

 

 

 

 

सफल भएको महसुस गरेकी छु

 

यशोदा गजुरेल
मधेश प्रदेश
सञ्चालक, यशोदा ब्याग तथा रेडिमेट उद्योग पर्सा
विजेता, इन्टरप्राइजिङ वुमन अफ द इयर

आज बल्ल सफल भएको महसुस गरेको छु । काम शुरू गर्दा कुनै दिन पुरस्कार नै जित्छु भनेर सोचेको पनि थिइन् । आफ्नो घरपरिवार चलाउन काम गर्दै आएकी थिएँ । तर आज राष्ट्रिय स्तरको मिडियाले मेरो कामको मूल्यांकन गरिदिएकोमा न्यू बिजनेश एज तथा आर्थिक अभियान परिवारलाई धन्यवाद व्यक्त गर्दछु ।

३ लाख रुपैयाँको लगानीमा काम गर्न शुरू गरेको ४ वर्षमै मेरो उद्योगले यो स्तरसम्मको सफलता पाउनुमा म एक्लैको मात्रै मेहनत छैन । मसँगै मेरो उद्योगमा काम गर्ने १५ जना सबै कर्मचारीको पनि सफलताको रूपमा मैले यसलाई बुझेकी छु । शुरूमा मेरो श्रीमान्ले पनि एउटा ब्याग उद्योग सञ्चालन गरिरहनुभएको थियो ।

त्यहीँबाट मैले सबै काम सिकेर पछि उद्योग दर्ता गरेर काम शुरू गरेकी थिएँ । मेरी सासु आमा र श्रीमान्को सहयोगका कारण नै म आज यो स्थानसम्म आइपुगेकी हुँ । अहिले मेरो काम देखेर अहिले सबै जना खुशी छन् ।

 

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस