अरुण काबेली पावर : कम्पनी विश्लेषण (मंगलवार, ११ असोज २०७९)

अभियान संवाददाता

आधारभूत विश्लेषण

कम्पनीले गत आवको मुनाफाबाट शेयरधनीलाई १० प्रतिशत बोनस शेयर वितरण गर्ने प्रस्ताव गरेको छ । प्रस्तावित लाभांश विद्युत नियमन आयोगबाट स्वीकृति पाएपछि र कम्पनीको आगामी १२औं वार्षिक साधारणसभाले पारित गरेपछि शेयरधनीले पाउनेछन् ।

कम्पनीको असोज २ गते बसेको सञ्चालक समितिको बैठकले उक्त लाभांश वितरण गर्ने प्रस्ताव गरेको हो । हाल कम्पनीको चुक्तापूँजी रू. १ अर्ब ८५ करोड रहेको छ ।  प्रस्तावित बोनस शेयर वितरणपछि कम्पनीको पूँजी रू. २ अर्ब ४ करोड पुग्नेछ । कम्पनीले अघिल्लो वर्ष भने १७ प्रतिशत बोनस  शेयर र कर तिर्न शून्य दशमलव ८९ प्रतिशत नगद लाभांश दिएको थियो ।

साथै कम्पनीले सत प्रतिशत हकप्रद शेयर निष्कासन गर्ने तयारीमा रहेको छ । उक्त हकप्रद शेयर निष्कासन गर्नका लागि कम्पनीले नियामक निकाय विद्युत नियमन आयोगबाट स्वीकृती पाएको छ भने सेबोनमा पनि निवेदन दिएको छ । सेबोनबाट स्वीकृती पाएपछि कम्पनीले १ करोड ८५ लाख ५२ हजार १०५ कित्ता हकप्रद शेयर निष्कासन गर्नेछ । विक्री प्रबन्धक नबिल इन्भेष्टमेण्ट बैंकिङ्ग लिमिटेड रहेको छ । आइतवार कम्पनीको शेयर मूल्य प्रतिकित्ता रू. ३७१ कायम भएको छ । यो शेयर मूल्य अघिल्लो कारोबार दिनको तुलनामा १४ रुपैयाँले कमी आएको हो । 

निष्कर्ष

कम्पनीको ७० दिनको कारोबार अवधिको अन्तिम दिनमा वियरिश प्रवृत्तिको कालो मैनबत्ती बनेको छ । यस्तो आकृतिले बजारमा आगामी दिनमा कम्पनीको शेयरमूल्य घट्दो प्रवृत्तिमा रहने संकेत गर्छ । यद्यपि पछिल्ला ५ कारोबार दिन निरन्तर घटेको बजारमा सामान्य रुपमा अल्पकालिन लगानीकर्ता अपेक्षा गर्न सकिन्छ । आरएसआई न्युट्रल जोन २५ दशमलव ३९ विन्दुमा छ । यसले शेयर बिक्री चाप उच्च रहेको देखाउँछ ।

कम्पनीको स्ट्यान्डर्ड डेभिएशन १० दशमलव ९६ विन्दुमा छ । उतारचढाव मध्यम रहेको देखाउँछ । यस्तो अवस्थामा जोखिम हुने र प्रतिफल प्राप्त गर्न सकिने अवस्था पनि मध्यम हुने गर्दछ । त्यस्तै कम्पनीको मुभिङ एभरेज २६ दिने औसत मूल्यरेखा र १४ दिने औसत मूल्यरेखा एकअर्कामा टाढा छन् भने हालको मूल्यरेखा यी दुबै मूल्यरेखा भन्दा तल छ । आइतवारको शेयरमूल्य रू. ३७१ देखि बजारको अवस्था परिवर्तन भई मूल्य महँगिएमा रू. ३९५ मा प्रतिरोध पाउने देखिन्छ । कम्पनीको यो मूल्य गत ७० कारोबार दिन यताकै न्यून मूल्य रहेको छ ।

सावधानी : हामीले उपलब्ध तथ्याङ्कको अधारमा गरेको विश्लेषण आफैमा पुर्ण होइन, लगानीकर्ताले लगानी गर्नु पूर्व कम्पनीको समग्र आधारभुत पक्ष र प्राविधिक पक्ष हर्नु आवश्यक रहेको छ ।

प्रतिक्रिया [0]